دعوه للعزوبيه * فارس القرشى

دعوة للعزوبيه !!!!!

زوجتي تحير شك وغيره **** وبترميني ف بحر الحيره

تتحكم في القلب وتحلف **** إني بعاملها كأسيره

وإن سألوني نصيحتك أيه**** عيشة العازب راحه كبيره

لو مديت أيدي علي أيدها **** وأنا ماشي يبقي بكسفها

وتقوللي فيك حاجه غريبه **** عايزه تمشيني علي كيفها

عيشتي زمان كانت مرتاحه **** عيشة العازب راحه كبيره

وإن ولدت وفرحت ببنتي**** أو سميتها مثلا هايدي

تعملها حكايه وتقوللي **** إن الأسم ده أسم حبيبتي

ع الحال ده في الست عيال**** وشي مصاحب للتكشيره

والأكل بجيبو لثمانيه **** وبيخلص ع السفره ف ثانيه

والأسعار في السوق بتزيد**** وبتكويني بنارها الحاميه

دين ورا دين بتضيق الدنيا****عيشة العازب راحه كبيره

وان بصيت علي جارتي كريمه ** أو سلمت تقوللي .. جريمه

وتقول بينها وبينك أيه**** بالتأكيد دي حكايه قديمه

وحياتكم علي طول مظلوم**** ومراعي لحقوق الجيره

عزمتنا حماتي ع المصيف**** قلت وماله أنا أتشرف

قالت بتألس علي ماما**** هي هتعزم وأنت هتصرف

حضر أكل الرحله بسرعه**** كنت بطولي ف راحه كبيره

وسألني عازب ع العيد**** مال عينك وارمه ياشديد

قلت ده من تأخير اللحمه**** والهانم قبضتها حديد

غصب عنها خبطت عيني **** ما أنت ف نعمه وراحه كبيره

قالت غير لي السيراميك**** لو مامعكشي اكتب شيك

وأوعي تقوللي جيوبي نضيفه **** مش ناقصه القصه تلكيك

قلت السجن ؟أرحم والله **** عيشة العازب راحه كبيره

الرجاله ياناس أبطال ****شايله بجوازتها أحمال

وأنا كان نفسي أطلق بدري **** بس حرام دول ست عيال

خدها نصيحه بلاش تتهور **** عيشة العازب راحه كبيره
‏"

» وحيد . شعر فارس القرشى
» أمَّا قصه !! . فارس القرشى
» نفسى يا امَّه . شعر فارس القرشى
» إزازه عايمه . فارس القرشى
» ماتناديش. كلمات الشاعر فارس القرشى . حلوان