حتة قماش شعر / هشام الجوهرى

حتة قماش أصلى
من توب البشر ساده
فى دولاب العمر متعانه
مطبقة متعطرة متكيسه
من العتة متصانه
لحد ما جابها القدر
من التطبيقة مفرودة
حكاية مسرودة
فى كتاب الحياة قصه
بمقص الزمن
اتقصت أحلى قصه
فصلها القدر خيطها
فى أيام الشجن ستره
اتفردت ألف مرة وانتنت
ريحتها لسه فيها مانتنت
اتغسلت بمية حزنها
ومسحوق صبرها
وبالأحلام اتزهرت
واتشنقت
على حبل الأمل نشفت
وكواها القدر كيه
تسر النظر
فى الراحة والجايه
و مع الأيام اتهلهلت
اترقعت عجزت
واتبقعت أوهام
وبطاس الزمن عاجز
يزيل البقع منها
يشيل الأذى عنها
قبل ما تترمى
فى شوارع النسيان
*****

الله على جمال فكرتك واسلوبك الممتع
السهل الممتنع
حقيقى انت شاعر جامد
وانا معجب بكتابات حضرتك جدا
فشكرا على امتاعى

» عود قصب // شعر / هشام الجوهرى
» هشام الجوهرى
» قصيدة (أخ) شعر/ هشام الجوهرى
» رغيف الزمن شعر / هشام الجوهرى
» من رباعيات الشاعر هشام الجوهرى