قصيدة (قوللي انت مين ) للاشتراك في المسابقة الكبري للمربعات

قولي انت مين؟
أصعب سؤال يدور في خَلَدَك
وجُوَّه روحك :قولي انت مين؟
إنت اللي كنت غريب في بلدك
ولا اللي سافر من سنين؟
قولي انت مين؟
انت اللي كنت زمان بتغرق...
\في بحر موجُه مليان ذنوب؟
ولااللي عايش سنين بيحرق..
قلبه وروحه عشان يتوب؟
قولي انت مين؟
انت اللي كنت دايماًبتضحك!
كل اما تسمع كلمة محال؟
ليه النهارده تِحِس جرحك...
وتقول دَوَاه وهم وخيال
قولي انت مين؟
إنت اللي كان لك زمان صُحاب..
جَرَحُوك وضحكوا لماانجرحت..!
ولا اللي ساكن فوق السحاب...
وكل عُمرَك سايبه تحت..!
قولي إنت مين؟
إنت اللي غامر بسنين حياته...
علي كل صاحب حسبته شهم؟
ولا اللي صان بالوحدة ذاته...
مع إن جارحه ألف سهم؟
قوللي انت مين؟
إنت اللي كانت دُنيِتُه....
حبيب وصاحب وحضن أهل؟
ولا الوحيد في سِكِتُه....
والكل شايف بُعْدُه سَهْل.
قوللي انت مين؟
إنت اللي كُنتْ فاكر حبيبتك...
في الدنيا شمس والناس شموع؟
ولا اللي فجأة صَبَحِت جريمتك...
في عينيها :حِلمَك بالرجوع.
قوللي انت مين؟
إنت اللي فَكَّرت السفر.....
فِيه القليل ممكن يزيد.
ولا اللي شاف حِلمُه انكسر....
في الغربة بين ساده وعبيد؟!
قولي انته مين؟؟
إنت اللي عِشت في عهد جاحد.
. ظلمه مَغْنَم وعَدلُه مِنَّة
ولا اللي شا يف أقل واحد...
في الجاه ومؤمن ..مصيره جَنَّة...
قولي انت مين؟
إنت اللي كنت تِتمنى قلبك....
ينسَى خوفه وسط الزحام...؟
ولاَّالنهارده قُرب رَبَّك......
أَمِّن حَياتَك بِين الأَنَام.
قوللي انت مين؟
إنت اللي يوم زمان شافوه ....
سَفيه وعاصِي ومالوهش بُكرَة؟
ولا اللي بعد السنين نادوه.....
وحَبُّوا يِقروا مِن قَلمُه فِكرَة.
قوللي انت مين؟
كُنت حاسِس أطَهَر مشاعِر.....
لمَّا لَمَحت ضِحكة طفولة؟
ولا اللي لمَّا غاب وسافِر....
عاش الأُبوَّة حِلم ف كُهُولَة.
قولي انت مين؟
إنت البَرئ والمُتَّهَم......
عاَقِل في مَعرَض لِلجُنون..
وَحش في الغربة التَهَم ...
أَجمَل حَقايِق وساب ظُنُون...
قولي انت مين ...لوكنت عارف!!!
إنت اللي فات ؟ولااللي جاي؟
لوعِشت عُمرك كُلُه خايف....
.من الحياة ...
ماتستحقش اسم :حي...
قولي انت مين ؟؟