فارس الأحلام . محمد فتحى السيد

فارس الأحلام !!
******************
الخيط الأبيض يلمع فوق
ست الحسن تفوق
الميه تطلى سحرها
مين قدها ؟؟؟
وعيون مها جوه المرايا ملحمه !!
الشمس طلت م السما
تشبه خدودها وثغرها ونور سحرها
تشيل مناديلها _ تطفى قنديلها
تهرب من العشه
تطوى خطوتها الشوارع
تتوه فى زحمة الميادين
تلتهمها كل عين
الواد يرقص الحاجب
يشجب الشايب
البنت تتدلل
خاليه الشوارع م الفتات
زحمه الاهات
اغصان تودع فى الورق
عصافير البطن بتصوصو فوق الرصيف
يسكتها الرغيف
يشتد عودها تطوف
الأمل ملفوف بخوف
م الحلق طالع صوت جميل
ينادى ع المناديل
الشمس تهرب م السما
الليل بيحزن انما . الوقت فات
ساعة الرجوع تخنق متاعبها الخطاوى
وساعات تلبخ فى الدموع
الفول بيقتل أى جوع
صعبه الساعات لما تطول تحت الغطا
الخطوه بكره ملخبطه
ضاله الطريق
النوم جرئ . سمكر عيون المها
فى الحلم سقَّط قلبها الفارس المجهول !!
على هامش البساتين جاى بالفرح طيران
فرش السنين ياسمين
على اليمين . الورد يضحك للهوى
على الشمال . الحور بتندب حظها
ابليس بينحت فى الطريق حبة حفر
اعوانه بيحشوا الأمل
جنح الحصان . فلت اللجام
فارسها واقع فى الملل
جيوبه فضيت م الدفا !!
اتسربت فيها الرطوبه
جمدت كل المشاعر
ماعدش شاعر بالشروق
الخيط الأبيض يلمع فوق
ست الحسن تفوق
تطوى خطوتها الشوارع
تتوه فى زحمة الميادين
وتعود فى اخر الليل
بالدم فوق منديل
ينعى انوثتها
ويلعن فارس الأحلام
__________________

اخى وصديقى الحبيب
الشاعر الكبير محمد فتحى
نصك رائع للغاية وسعدت بمرورى لديك
لك مودتى وتقديرى

» الشاعر محمد فتحى السيد والشاعرة جيهان فتحى فى سجال عيون القمر . وآراء النقاد
» أهداء من الشاعر محمد سعيد للشاعر محمد فتحى السيد
» الشاعر محمد فتحى السيد . متخافيش
» الشاعر محمد فتحى السيد
» لسه بتفرعن . محمد فتحى السيد