الوريث للشاعر احمد فخري

يادي العجب

لما اعتزل فرعون

جعل الوريث موسي

ولما حكم موسي

مسك الصاجات فرعون

وجعل معاه الاوليا

يطفوا عيون الشمس

ويقيدوا بالكرامات

طول الليالي السود

والقاضي لما حكم

الحكم كان مقلوب

يا ضاربين الودع

يارافعين الطوب

فينه دم الجدع

علي السكة كان مسفوح

مين اللي مسح الاتر

وساب حلمنا مدبوح

يا ماسحين الاتر

يا مسعرين النار


انا اللي عاش مسطول

قابل اعيش وعيني نصها مقفول

ترميني بطن الغول

ادخل في بطن الغول

وادي

الدم علي الرصفان

حالف ما ينشفشي

طول ما الراكب حالف

ما ينزلشي

والماشي محكوم عليه يمشي

دبلت عيون الشمس

والحلم لسه بعيد

عميت عيونا من انتظار الشمس

والخيول فوق الرقاب حوافرها

والكلاب بيادتها فوق راسنا

قولنا ما يهمش

طول ما احنا علي بابنا

بنزرع غيطان الحلم

تطرح امل كداب

معقول يا ناس معقول

حلمنا بالشمس

يطلع دة برضه كابوس

ضمير المحكمة يشتروه بفلوس

الباطل فوق رقاب الحق

يعدي عليه ويدوس

يا كلمة ليه

خرسة وفاقدة النطق

يا حق ليه عميت عيونك

يا عقل مين اثبت جنونك

المحكمة نطقت خلاص بالحكم

يا واقف بعيد تطعنها بالتزوير

نسيت ان الكبير لو حتي مرمي كبير

دة البير غويط ما باينلهوش قرار

وادي اللي زاد النار


لما اعتزل فرعون
خلي الوريث موسي


كلمات احمد فخري