موسوعة شعراء العامية - الشاعر / مدحت عطية

الأسم : مدحت عطية حسن عبد البارى

تاريخ الميلاد : 21/2/1966
الاسكندرية
المؤهل :
حاصل على بكالوريوس تجارة أدارة أعمال – جامعة الاسكندرية – سنه التخرج 1992.
حاصل على لسيانس آداب قسم اللغه الانجليزية - جامعة الاسكندرية – سنه التخرج 1997.
البريد الالكترونى : www.medhatattia21@yahoo.com

الأهتمامات :
متابعة الحركة الآدبية والأحداث السياسية والتفاعل معها – وكتابة الشعر
تم أصدار أول كتاب شعر ( أنا كلمة ) وتم توزيعه بالاسواق عن طريق مؤسسة أخبار اليوم .
وتحت الطبع الديوان الثانى ( الصدى )

نوع الشعر :
العامى

الأوسمة :
حاصل على عدد من الأوسمة فى الشعر

العضوية :
عضو رابطة شعراء العامية المصرية
عضو رابطة الأدباء والمبدعين العرب

راى فى واقع الشعر العربى ؟؟؟؟؟ !!
مقاطع قصيرة من بعض أعمالى :

البكى . . مش دموع

البكى .. مش دموع
ولا الغربة .. سفر
والنور .. مش شموع
ولا الجناين .. شجر

الونس .. مش رجوع
ولا الدفى غطا
والحب مش خضوع
ولا الجفى .. حجر

ساعات جوايا يبكى
وعينى ما تزورها الدموع
وساعات ألقى خدى
من غير دموع .. مندى
وقلبى دبلان
فى الضلوع

ناديت عليكى

سألت ..في بعدك
كل الشوارع
ناديت عليكى
في أدان الجوامع

جريت
مسكت شمعة
وناديت
خانتنى دمعة
وبكيت

بقلب .. أم
تاه وليدها
بدمع طفلة
سرقوا .. عيدها

يبقى .. حنعيش

لسه فيه شمس .. بتطلع
فيه قمر .. بيهل
فيه حق صوته .. بيطلع
فيه شجرة تحتيها .. ضل
سامع دقات قلوب
فيه شوق في عين الكل

لسه النهار بيجى
والعين فيها دموع
فيه قوله أخ
فيه أم .. وطوع
فيه طفل بيضحك
لساك ياقلوب في الضلوع

حيطان جدران

كتير الحدود
فوقينا .. حيطان
ايدينا مش طايله
حوالينا .. جدران

عمر حيران
ورا قضبان
نهاره عتمه
وليله .. غضبان

قدمنا سد
وراه .. أسوار

وكل سور
وراه .. غدار

عطاشا .. ياحنا

عطاشا .. ياحنا
والنيل .. جارنا
غربا
والدار .. دارنا
عطاشا
مع أن السواقى .. بتدور
عطاشا
رغم .. كل البحور

عطاشا .. والميه
ماعدتش تروينا
ما عدش الخلا ... يسعنا
ما عدش العمر .. يكفينا

بنجرى .. ونخطى
وندوس في الطين
بنحبى .. ونوطى
لكن جايين

مُنايـا

منايا .. أرضك
أرويها
تعطش أكون
سواقيها

منايا .. عنيك
أعيش فيها
أسكن فى ليلها
أدفيها

قالوا عنه

قالوا وطن
قلت .. أم
وبتنحضن
قالوا كلمة
قلت حروف
تشد القامة
وتصلب .. بدن

قالوا بيت
قلت فرشه دافية
قلت سكن
قلت حبيب
يوم ما يجيبه سيرته
تحس بشجن

فجأه

بعد ما قولنا ناموا
أتاريهم صحايين
بعد ما قولنا راحوا
أتاريهم .. جايين
أتاريهم قاموا
مع بكره .. متواعدين
فجأه قاموا
مسكو شمعه
خلو الضلمه تركع
فجأه خطو خطوه
صعب .. ترجع

الله عليكم

الله عليكم
على الفجر
إلـ تولد .. بإيدكم
على وشوشكو
على اللمعه
إالـ فى عينكم

الله عليكم
على بكره
إلـ مستنيكم
يحلف ما يكون
غير ليكم

مُش نص ثورة

لو طفوها
مش .. هتلمع
لو خنوها
بجد .. توجع

لما تخطى
أوعى ترجع
لما تقوم
أوعى .. تركع
أوعى بعد الصدى
تستنى .. تسمع