رباعيات مواويل اكتوبر للمسابقة الكبرى

ياما مسكت القلم ورسمت بطولاتك
وكتبت لك مواويل على كل صفحاتك
الله يطول الأجل وأفضل أغنيلك
ياأم الحسين والسيدة الطاهرة راياتك

كتب التاريخ تشهد جواها حكاويك
بطولات كتيرة ومعارك ضد اعاديك
من قديم الازل عيونهم ما بتسيبك
مهما ترابك بكى الرب حاميك

يامصر ياغنوتى ياطاهرة من يومك
مهما فعل العدو الضى فى عيونك
نيل جوه الحشا م الجنة ينابيعه
وطور سينا زينك وملايكة بتصونك

أكتوبر دا غنوتك وثورة التحرير
غناه تراب الوطن مع صرخة التكبير
دم الشهيد ابتسم ساعة ما شاف النور
شق الظلام وابتدى العصر بالتنوير

قالوا ذكرى عبور قلت دى حقيقة
محفورة جوه القلوب يوم سته بدقيقة
بدماء اعز رجال شالوا الكفن ع الايد
عبروا جميع المحال ورجعولنا حقيقة

سته من أكتوبر فى التاريخ محفور
بدماء حلفت يمين لتحرر المأسور
وتعيد نخيل الرطب وتعيد لنا الزيتون
رمضان سمع الندا يوم عشرة جه بالنور

بين شطى القنال اترسمت السكة
بدماء شباب ورجال والصحبة من مكه
ساعة ماقطع الهمام فيصل البترول
وحدة عروبة ودين بداية السكة

لحظة ماعبر الولد وبدأ يزيل بارليف
كل السما كبرت لنهاية التخاريف
جيش اليهود اترعد من صرخة التكبير
لحظة ما شاف عساف مأسور مع بارليف

بارليف لما انتهى صرخت جولدمائير
نادت على امها ولوبى الخنازير
جالها طيور المدد وبيانات بتدين
ردت عليهم الملايكة اليوم يوم التطهير

لما عبرنا القنال والراية فى ايدينا
كبر جميع الرجال يارب قوينا
نمسح دموع الالم من سينا وعيونها
الرب سمع الندا النصر كان لينا

لما عبرنا الخطوط وسينا لمحتنا
نادت علينا بفرح جاوبنا بحياتنا
نفديكى بدمنا قومى امسحى دمعك
وغنى ويا العلم ياحته من بيتنا

شهداء بلدنا رموز وشجاعة وطنية
بالدم شالو الامانة وعادولنا بالحرية
...دا مهما مر الزمن السيرة محفورة
فوق جبين الوطن وارضنا العربية

ياسينا يامزهزهه بدم أغلى شهيد
يامسرى الانبية وطور سينا شهيد
الكل فيك طمعان لكن ورب الدين
حب الشهادة مزروع فى قلب كل وليد

معروف لكل الامم نصر بدم رجال
حلفوا مايعلو بغنا ولا حتى بالموال
الا اما يرجع لهم النخل والزيتون
اللى اغتصب واتسجن بايد عدو محتال

مهما غنى القلم للنصر والامة
عمر حبر القلم ماهيرفع الغمة
الا اما قدس الامم يعود بالتحرير
ساعتها يحلا الغنا ونبرأ الذمة


فى النهاية التحية للشهدا والحيين
من قلب ياما اتوجع وتاه مع التايهين
واليوم عاد للفرح وذكرى التحرير
الله عليكى يامصر الله يامصريين

.................................................
عبدالهادى الشعراوى
الفتى القروى الساخر
...........................[b][center]