عالم بدون تامر

r‎

عالم بدون تامر

________
ـ عالم أول ـ

أهلاً بيكي..

واحد..اتنين ،

شهيق.. زفير ،

اركبي شمس جديدة وعدّي..

ويّا خيوطها..

كوكب فاضي..

وقمر ميّت..

قدّام عينك كوكب أزرق ،

حبّة أخضر فاتح.. واصفر،

قرّبي أكتر..

صوت براكين فـ جزر مهجورة..

تسبح جوّة اللون الأزرق ،

خشّي غلافه الجوّي بسرعة..

أهلاً بيكي فـ عالم نفسك..

................................

تصحى عيونك..

لمّا بتسمع..

أول رنّة من تليفونك ،

واحد منهم ! !

ـ مستنيكي.

ـ مش هتأخّر.

.................................

نفس مدينتك..

عدّي شوارعك

بين أسراب النمل الزاحف ،

الكليّة ! !

نفس الكرسي..

كان مستنّي قرب السور..

بعتت رنّة..

رد عليها..

ـ أهلاً بيكي

* فات ساعتين *

ـ آسفة لازم أمشي.

ـ أشوفِك بكره.

رحلة عودة لبيتك تاني..

ويّا صحابك..

ـ قولي احكيلنا..

قالّّك إيه ؟؟

اضحكي نفس الضحكة وقولي.. نفس القصة

عدّى اليوم ؟

اطمنتي ؟!

لسّة زخيرة عينك..

حيّة ..

افتحي درجك..

ورقة انقرضت..

فيها قصيدة كات بتقول:

إنك هبة الحب الأول ،

وإن عينيكي كنوز حرمان ،

أيّ كلام..

قطّعي وارمي ،

شمس بتغرق..ليل بيعوم..

كوكب تاني..

بالتأكيد..

بقى من غيري..

عالم أجمل..

أهلاً بيكي.

ـ عالم تاني ـ

أقمار صناعية..

بتجيب الصورة،

باب العالم..

حارة قديمة جنب الجامع..

زحمة القمّة..

أب بيلعب دومينو هناك..

عركة بعيد ع القمّة التانية..

ستات بتبصّ من الشبابيك..

أخ بيجري يشوف جرى إيه ! !

والأخ التاني طلع البيت ،

صناديق كرتون ..

ورا باب الشقة..

محشيّة كتب..

برواز مشروخ وحواجبه تقيلة..

محطوط ع الوش ،

أوضة اتقفلت ويّا غيوم فـ السقف بتشتي..

قشرة وطوب..

فوق ع الكنبة..

فوق فـ رفوف مكتبتي الفاضية..

والأدراج..

مفهاش ولا حاجة ،

أخ بينزل بالصناديق..

والبرواز..

وقع اتكسّر..

بالتأكيد..

كان عالم..

أوسع.

ـ عالم تالت ـ

عالم ضلمة..

سلالم رمل..

وعمود النور..

مناخيره كبيرة..

وبيرمي بضل حواجبه الأرض

أمطار حبرك..

بتغرّق..

فـ بيوت الورق المتنيّة..

وشوارع قش ،

أقلام..

تتدحرج ع الأرض ،

والناس..

شكلها مألوف..

تشبه لمرايتك ،

والأسود مرسوم فـ سماهم وبيوتهم وشوارع سد ،

كان ماشي بيضحك..

وعمود النور مناخيره كبيرة..

كات إيده فـ جيبه ..

بيبصّ وراه..

وبيرمي حواجبه..

أحزانه..

مناخيره الضخمة..

فـ وشوش الناس..

والحبر يرخ وبيغرّق..

صورة اتمسحت..

والضحكة بتوسع على خدّه وشعاع النور ،

بالتأكيد..

كان تامر تاني.

» عضّــــة . شعر . تامر انور
» بدون مونتاج
» افكار بدون ترتيب