حلم قلم شاعر

[b][center]آدى إحنا زى مااحنا
بعد م الثورة قامت
صرعات والكل باعنا
وحياتنا والله هانت
خبيث حلنجى صايع
كله بيلعب سياسة
وزى ما ضعنا ضايع
... الكرسى والرياسة
ماتت والله المبادىء
والنيل جراحة زادت
إزاى هيعدى بكرة
وانا شايف الضلمة سادت
ملعون أبو السياسة
المعجونة بخباسة
بكفاية الأمة ضاعت
بإيدين ملاعين وساسة
وآدى إحنا زى م احنا
هى هى القماشة
العتة فيها لابدة
زارعة فينا الهشاشة
صدقنى ياعم جمعة
أنا مش غاوى كلام
فى عنية ألف دمعة
بتحضنها الالام
من دم فى كل حته
بيصرخ ع الرصيف
وكل جمعة تشهد
على شدة النزيف
وشهيد عمال بيسأل
إزاى فطيس أضيع
إزاى هرتاح فى بيتى
والكرسى عليه وضيع
أنانفسى فى حكم عادل
ورئيس بالعدل حاكم
مايكونش له وريث ولا
زوجة له تقاسم
مايكونش شيخ وبابا
ولا حتى من الفلول
ولا يبقى له عصابه
ولا ديل من الديول
انا عايزه ابن حنكه
يعرف اعب اليهود
مايهموهوش امريكا
ويكون زى الجدود
انا عايزه ابن نيل
يعرف قطنى الطويل
يزرع يصنع يعمر
مايكونش ياناس هابيل
انا عايزه يحس بيه
ويعيد كرامتى ليه
لو يوم الظلم طالنى
يقيم لى ميت قضية
صدقنى ياعم جمعه
انا نفسى يكون رئس
فلاح من طمى مصرى
يعرف دعم الرغيف
يعرف يحلم لبكرة
مايكونش ياعم زيف
ساعتها هنسى همى
واحميه ولو بدمى
واطبع صورته فى قلبى
واقول داحته منى
ده حلم ياعم جمعة
بتمنى يكون حقيقة
نفسى اغمض عنية
واشوفه لو دقيقة

رابطة شعراء العامية كتب:: شكرا لك نجمنا الجميل
( الشاعر عبد الهادى الشعراوى)
لمشاركتك فى مسابقاتنا الحالية
مسابقات رابطة شعراء العامية المصرية
ونتمنى لك التوفيق بالفوز والتألق المستمر
فلك محبتنا واسمى التقدير

أشكركم ولكم تحياتى ودعواتى للجميع بالتوفيق

» شاعر سياسى
» احكى يا شاعر
» ثورة شاعر
» إنذار قلم شاعر
» أيوه انا شاعر