الشاعر علاء أبوذكري ( قصيدة ولسة الحلم جوايا )

ولسه الحلم جوايا
بيستنى شعاع الشمس
وجوا القلب ضحكايا
بتهرب من دموع الأمس
ونبرة صوت ب تِكِويني
تراب بلدي ف تَكْويني
تلاقيني
ببص لفوق
وأدعيلك .
أنا العاشق لأحضانك
انا المهموم بأحزانك
شربت المر بكفايا
ولسة الحلم جوايا
-------------------
ولسة الحلم بيغني
بصوت مدبوح
بينزف دم متحني
حلاوة روح
ويتنفس بقلب شهيد
وصوت مسموع
معدش رجوع
يا أوطاني
بصوت عالي
راح أمسح كل أحزاني
وعدي البر للتاني
علشانك
علشاني
كفايا سكوت
ولو راح أموت
يعيش حِلمي
بأكفاني
---------------
ولسه الحلم عود أخضر
بيحلم زينا يكبر
ويتكلم بعلو الصوت
مهوش خايف
ويتعلم ف عز الليل
يكون شايف
ويكره يوم
يعيش أعمي
يحب الفرحة واللما
ويتنفس بحرية
يكون صافي كما المية
يا حلم النور ف أوطاني
يا صرخة أم وجعاني
منش جاني
أنا المجروح
على شط الهوى
راسي
رسمت الحلم نبراسي
رويت حلمي بأنفاسي
وعشت الحلم من تاني
على أرضي
أنا موجود
عبرت الكون بأنغامي
وشايل قصتي معايا
ولسه الحلم جوايا
=====================
علاء أبوذكري

شكرا لك نجمنا الجميل
( الشاعر علاء أبو ذكرى)
لمشاركتك فى مسابقاتنا الحالية
مسابقات رابطة شعراء العامية المصرية
ونتمنى لك التوفيق بالفوز والتألق المستمر
فلك محبتنا واسمى التقدير

[b]

الشكر لك أستاذنا الكبير على أثراء حياتنا الادبية وإنتمائي الي رابطة شعراء العامية
يزيدني فخر وفخار