قصيدة (شاهد زور) للاشتراك في المسابقة

معابد زيف ف إيد كهنة..
حيطانها باردة خنّاقة..
وصوت ترانيم بلون مَغنا..
وروح لخلاصها مشتاقة..
وانت وحيد بتتفرَّج..
وم الأحلام بتتفضَّى..
وقلبك فيك بيترَجرَج..
وتشرب كاس من الفضّة..
وده دجَّال وبيماطِل..
ويغزل م الحرير التوب..
يعَلِّي الصرح بالباطل..
ولا عمره ف يوم حيتوب..
وده المسرح ودي الكواليس..
وده المشهَد طويل محبوك..
عروسة وزفَّة بالتدليس..
وشاهِد زور يقول مبروك..
ولو مش عاجبك المشهد..
اصرخ وانت ف المنفى..
الاف ضدَّك اهي بتشهد..
وف جراحك بتتشَفَّى..
مالكش مكان علي المسرح..
ولا من حقك التعديل..
يادوب ليك خيال يسرح..
وماقدرتش علي التمثيل..
كإن الأرض دي خندق..
وفوق شايف قصور عالية..
ماتتخلَّاش عن المبدأ..
ولو فاتت سنين غالية..
وبكرة الحلم يتحقق..
وفرحة من بعيد جايَّة..
وروحك بالوعود تنطق..
وست الحسن مش ناسية..
وقلبك م الألم أجرأ..
ولسَّة قصتك باقية..........

تم التقييم من قبل لجنة التحكيم
وارسلت النتائج لرئيس اللجنة