قصيدة (آخر سطور الملحمة) للاشتراك في المسابقة

خِلصِت حكايات العَلَن..
واحكي عنِّك من مكاني..
احكي ليكي..واحنا بينا..
أميال كتير مالهاش عدد..
شايفة عمري بيتدفَن..
شايفة قلبي بيتسجَن..
والرجعة ذنب بيتلَعَن..
وانتي ساكتة..
مابتنطقيش..
ومادام ماليش ..
ف شرع قلبك غير كَفَن..
خليه لغيري ..
يمكن ف يوم يتدفَّا بيه..
ماهي كل أيامك شِتا...
أحلام صبايا بين الدروب متشّتِّتة..
روح الولاد بين البلاد متفتِّتة..
وانتي إمتى هتغضبي..
بس أقولك ..ماتغضبيش..
غضبانة ليه..
والحكاية لسة حية..
إوئديها..
زي البنات ف الجاهلية..
قبل وحي..
وقبل شرع الأنبيا...
الوأد كان ف الأرض شرع..
صدق ال قال..
لو يوم يميل الريح بأصل.
تستنَّى ايه من كل فرع..
ياشهر زاد..
الشق زاد..
ولا عاد يفيد ترميم حيطان الأبنيا...
والشرخ صَدع..
والتوبة خير ...لو تتقَبَل..
ولا اي طير..
يقدر يعيش جوَّة الكهوف..
وازاي حبيب..
يرضَى من خاينة الكسوف...
لو شفتي بدر..
نوره قرب يكتمل..
ضُمِّي يا سمرة الكفوف.
وارفعيهم بالدُّعا..
يمكن تكون ساعِة إجابة...
سَكِّتي صوت السكارَى...
واكشِفي المواخير..
حاجي ع الطير الأخير..
واتوضِّي بدموع الغلابَة...
هِدِّي الجُحور..
واتكلمي من غير غرور..
لو فاكرة نفسك مُلهَمَة....
حاسبي لا يضيق الفَضَا....
مافيش ف قلبي غير ألَم..
مافيش ف إيدي غير قَلَم..
جَف وفَضَا..
باكتب بآخر نقطة فيه....
آخر سطور الملحَمَة...........

شكرا لك نجمنا الجميل
( الشاعر نادر محمد )
لمشاركتك فى مسابقاتنا الحالية
مسابقات رابطة شعراء العامية المصرية
ونتمنى لك التوفيق بالفوز والتألق المستمر
فلك محبتنا واسمى التقدير

[b]