اغنيه انا الشعب احمد الصارم للمشاركه في المسابقه

انا اللي بقوم من نومي واروح علي شغلي من بعد الاذان
وانا اللي بيجي عليا الليل ربنا اعلم ازاي بنام
وانا المطحون في موصله وزحمه اسمها اتوبيس
وانا اللي حلمت في يوم بالزفه وقال ايه عريس

انا الشعب يامصر يا ام البلاد....انا انداس عليا من كل العباد
انا اتبهدلت...وانا استحملت....وانا اللي هموت عشانك يامصر

انا اللي اترميت في الشارع لما طلبت العلاج
وانا اللي اتسجنت في قضيه اونطه بالكرباج
وانا اللي حفيت علي شغلانه بكام ملطوش
وانا اللي بسف ترابك ياغاليه وماكرهتوش
انا الشعب يامصر يا ام البلاد....انا انداس عليا من كل العباد
انا اتبهدلت...وانا استحملت....وانا اللي هموت عشانك يامصر

انا اللي نزلت في يوم من بدري وروحت الميدان
وانا اللي هتفت وانا اللي داويت الجرحي كمان
وانا اللي حضنت في صدري رصاصه وقالوا شهيد
وانا اللي اتهجمت وانا اللي اتعملت زي العبيد

انا الشعب يامصر يا ام البلاد....انا انداس عليا من كل العباد
انا اتبهدلت...وانا استحملت....وانا اللي بموت عشانك يامصر
احمد الصارم