قبل ما تغضب للمشاركة فى مسابقة الشعر العامى

[center]قبل ما تغضب



قبل ما تغضب
قبل ما ترفع ايدك تضرب
قبل ما تحرق والا تخرب
اسأل نفسك مرة وجرب
أنت عملت لدينك ايه؟
خلى الكلب يهاجم فيه
ويسيىء لنبيك ولربك
وبقيت زيه ترد عليه
طب دول كفرة مش عارفينه
لكن هما فيك شايفينه
انت مرايته مراية دينه
تشتم تقتل تسرق تنهب
يبقى ازاى هيصلوا عليه
صلى الله عليه وسلم
كان الاكرم
مش محتاجة اشرح او امدح
وكلام ربى احلى واوضح
ولا كان كاهن ولا كان ساحر
ولا كان مجنون ولا كان شاعر
حتى فى خلقه كان الاعظم
حاولت فى مرة تقرا فى سيرته او تتعلم
لما الكافر عمه هجاه وقاله مذمم
عارف رد عليه ازاى صلى الله عليه وسلم
قال لاصحابه صرف الله عنى اذاه
سب مذمم لعن مذمم
وانا محمد ثم تبسم
ما هو لو فظ غليظ القلب
كان انفض الناس من حوله
ولا عدينا المليار مسلم
زعلان انت ماللى هجاه واللى اذاه
زى ما للبيت رب حماه
رب محمد برضه اواه
واداله لحد ما ارضاه
ولا يوم تركه ولا ينساه
وف القران كرمه علاه
وشرح صدره ورفع ذكره
وم اللى استهزأ منه كفاه
وانت كمسلم تعرف تغفر
تعرف تدعى للى اذاك
يمكن يوم ربنا يهديه ويبقى رفيق ف الجنة معاك
تعرف مرة قبل ما تغضب
قبل ما ترفع ايدك تضرب
بنفس الايد تميل على طفل يتيم وتطبطب
او ارملة مسكينة بتتعب
تدى رغيف لفقير محتاج
تدفع السيئة بالحسنة يمكن تكسب
تعرف تحسن جيرة ف حارة
حتى ان كانوا يهود ونصارى
تعرف تمدح قبل ما تشتم
تعرف تبنى قبل ما تهدم
قوللى يا مسلم
عايز فعلا حق رسولك؟
خليه قدوة حتى فى قولك
وانت ساعتها هتعلا وتعلا
ومحدش ف الدنيا يطولك
ولا هيمسك ولا هيمسه
كل الناس جواك هتحسه
هتشوف نوره وتبان شمسه
عايز فعلا حق رسولك
خليك فرع وهو اصولك
خليك مسلم
ترضى الله وترضى محمد
صلى الله عليه وسلم
بقلمى نجلاء نعيم

شكرا لك نجمتنا الجميلة
( الشاعرة نجلاء نعيم)
لمشاركتك فى مسابقاتنا الحالية
مسابقات رابطة شعراء العامية المصرية
ونتمنى لك التوفيق بالفوز والتألق المستمر
فلك محبتنا واسمى التقدير

[b]