مختارات من ابداعات الزجل لمجموعة من نجوم الرابطة وتجدد

الشاعر فارس القرشي
فين الوفا ؟
**************
فهمني مش بالفلسفه
يا خالي ليه ضاع الدفا
جوه ولد لما أتولد
مخنوق وحلمه في السفر
ماشي ف طريق مليان حُفر
حياته ضنك ف أرضها
مُره وفاقت حدها
طالعه مع الضحكه هموم
ونجومه ترحل م الغيوم
وكل مايشقشق أمل
ويقول خلاص جرحي أندمل
يلقي الأمان منه أختفي
ويلاقي أمه الطيبه
علي جمرها متقلبه !!
وف حُضنها حبِة وفا
بس الوفا مافيهوش دفا !!
ومهما تعمل .. عشقها
بيبان عليه ف جرحها
وان فضلت عنه الغريب
وف فرحها مالوش نصيب
ياخالي لو من غير دفا
لكن ده غير العاطفه !!!!!!!!!!
بواسطة الشاعر فارس القرشي

الشاعره ايمان مصطفى
شخبطه لخبطه
ًًًًًًًً_________
ناس متمرمته

بهدله برجله

أحوال بالبلا

و إدين الناس

أهى متربطه

دراويش وحشيش

والشغل مفيش

ورغيف العيش

يجى بالمرمته

ساهين لاهين

عاقلين مجانين

صاحين نايمين

مسطيل فايقين

والعيشه يا ناس

مش متظبطه

أزمات فى الغاز

حتى البوتاجاز

فين البنزين

هنجيبه منين

بلطجه بتزيد

ومفيش فى الإيد

غير سنجه حديد

اعلامنا مريض

نازل تهديد

والحر طريد

فبركه بيجيد

والحزن شديد

مش راضيه اكيد

على فكر مريض

دى بلدنا ياهو

شبعت مرمته

ولا عاد فى أمان

ولا فيه إيمان

والباشا والبيه

عايشين كدا ليه

الأكل بانيه

واللبس دا أيه

وحياه سواريه

وعيالهم ايه

حلوه مأطئطه

سكنين فيلات

والعربيات

أحلى المركات

وفلوس بزياده

تقدى وشيكات

بالزمه كلام

يا سلام يا سلام

ليهم الراحه

وإحنا المرمته

ريسنا كمان

وش الاجرام

بيقول مسكين

وإحنا الظالمين

شفتوا الموازين

كده مظبطه

و العادلى كمان

وباقى الأخوان

وحكومه حراميه

فى نهب الناس

كانت متورطه

وأبواب مسدوده

وأنفاس معدوده

وشبابنا ياهو

فى بلاد العالم

شبعوا شحططه

بواسطة الشاعرة ايمان مصطفى

محمود عطية
_______
حاكم بامره خيال مآته
الكرسى لازق باستماته
ما سك لى فيه تقول تباته
-------ماانا بطبعى غاوى غتاته
الكل قال تظلم خيال
ساعات بيقى زى الرجال
الطير بيهرب لو حتى مال
------بحركه لكن تاته تاته
ادعوا لحاكم يطول ف عمره
خليكوا دايما تحت امره
ماهو شمس الوطن وقمره
-----استاذ تسول فن وشحاته
عاوز اقول ان بصراحه
حاكم وباكس عنده بجاحه
غبى بغباوه برحه براحه
------واحد فى واحد بقوا تلاته
حاكم وظالم بس ولكن
عشش جوه عقولنا ساكن
ضلم بايده كل الامكان
------حاوى بيلعب حاته باته
ياشعب نايم فوق قوام
يضحك عليك بحبة كلام
ليه تقول عيشه وسلام
------ببسمه لكن فيها شماته
حكام ولكن خيال مآته
بواسطة محمود عطية

شكرا لك على مجهودك الكبير
وحسن اختيارك الرائع
استاذنا الفاضل الشاعر محمد فتحى
تقبل مرورى وتقديرى

» مختارات من الشعرالغنائى لمجموعة من نجوم الرابطة وتجدد
» مختارات من الشعر العامى لمجموعة من نجوم الرابطة وتجدد
» مختارات من ابداعات الأعضاء فى الموال و المربعات والرباعيات
» مختارات من ابداعات الشاعر / محمد فتحى السيد
» مختارات من ابداعات الشاعر / محمد فتحى السيد