مختارات من الشعر العامى لمجموعة من نجوم الرابطة وتجدد

كلمة آه
كلمات ضحى جبر

لما كلمة آه تتحكم فيا
تتحول شطرة فى صفحة هم
يتجمع كل حروف الزمن الجاى
يضحك قلبى انه خداعنى
يبكى ساعات حروفه بدم
آه
وساعات بحلم بالمتاهات
اسرح ويا ساعات الدنيا
ومعها دقات
المح نفسى وسط عقارب الساعه
ثانية دقيقة او اوقات
و فجأة
الاقى نفسى وسط أهات
ينده اسمى كلمة آه
يتحول كل حياتى فى نار احلام
و اصحى و انام و ابكى واضحك
والعب واسرح واعيش حكايات
كله عشان
كلمة آه بتوجعنى
ايوة ساعات نفسى احلم بالحرية
و احب كلامى
واعشق كلمة آه
واغزل كل حروف الدنيا
جلدى دواير
اغرق فيها
الاقى دموعى تحكى فى عز طلوع الشمس
وتدور على قمرايا تهرب فيها
و تخبى حكاياتى فى كلمة آه
و انا بنده على اهاتى بصوت هادى
و بعلى بقلمى كلمة حق
و بدارى على احلامى واسرح
واضحك و انا بابكى
و عيونى يتعزف
من وتر الهم
كلمة آه
فى عنيا تنادى
وتنده من بعيد عليا
و انا هاجى
و ادور على نفسى جوايا
مش بلاقيها
و افضل ادور ادور فيها
ألاقى نفسى بعيد
ساكنة الدنيا بكل مافيها
وألفين آه
من كلمة آه
بواسطة: الكاتبة ضحى جبر

أبو علوه جامع
سيمفونية حب ليكى
شدت الأوتار فى قلبى الكافى خيره
وابتديت دلوقت اصدق .. ان ممكن د
ق قلب
يروح يدق ف قلب غيره

سيمفونية

من زمان وانا نفسى فيكى
بس روحى ماطايلاكيش
من زمان وانا نفسى أفرح
نفسى ف عيونك أعيش
بس رغم التلميحات .. والتنويهات
رغم شجن الأغنيات
وبرغم كنت استنى ضوء اخضر
يعدى الأمنيات
كان الدلال سابق خطاكى لسكتى
وكنتى كاتمة صوت لنبرة فرحتى
وكنتى أهتى ف أنتى
ولاهمكيش .

حاولت أجمع فيا بعض شتاتى
وحاولت مليون مره اعيدنى لذاتى
حاولت .. ثم حاولت .. ولاجدوى
ماانتى القصيده وقصتى
وجميع مافى الندوه
وانتى اللى فات من عمرى والآتى .

ولأن خيبتى استفحلت قوى فى الهروب
قررت اخوض للقرب منك
كل أنواع الحروب
عل وعسى
ادوق مذاق الشهد ف رضاب القبل
من بعد ماقررت انى
مااكونش فى حبك هبل

طرحت شبك الهوى
وطرحت اسئلتى
وقلت يانموت سوى
ياقتلت
ياقتلتى
حضنت فيكى المعانى
والحضن كان دافى
ونهلت من شفتينك
قطرة عسل صافى
ودخلت أحاسيسك
حسيتها نشوانه
خايفه صحيح لكن
بالمثل ولهانه
ياحبيبتى عندى سؤال
جاوبينى بأمانه
امشى ف طريقى ولا
من مشيى زعلانه ؟؟
بواسطة: أبو علوه جامع

منصور رجب
العيال ذكرى

مع طلقة المدفع
بيشد نفسه لضلمة الدخل
يدخل
ويطفى النور
على فكره دايماً تيجى وتطارده
يدخل
فتشبط فيه
م العتبه للمدخل
يدخل
فتصعب عليه
فيسيب إيديه تلعب مع الذكرى
تضحك
فتضحك عينيه
يزعل.. تطبطب عليه
فكره
مسموح تعيش وياه
ويعيشها ف الضلمه
لكن تموت ف النور
كل اللى حبوا الذكرى
عاشوا الفكره ف الواقع
أما هو
فلم يصبه الدور
مع طلقة المدفع
بيشد نفسه لضلمة المدخل
يدخل
يعيش الدور.
بواسطة منصور رجب

أبو علوه جامع
ستاير حب

*****
وتتخبى
ورا ستارة قماش شفاف
بلون بمبى
تبين كل تفاصيلك
وانا شايفك
وشايفاكى عيون حبى
وسامع لحن موالك
وعارف
كل شئ عنك
أحاسيسك .. وأحلامك
وصوت الهمس فى ظنك
وتتخبى
ومهما عنى تتخبى
ستايرك دى دى قناع مفضوح
بأسرار الهوى بتبوح
ولون البمبى لون بيدوب
مع الألوان
يزيد الروعة فى الصورة
جمال فتان
وقبل البمبى والألوان
جمال حسنك ياست الحسن
هو الأصل والفنان
بواسطة: أبو علوه جامع

شكرا لك على مجهودك الكبير
وحسن اختيارك الرائع
استاذنا الفاضل الشاعر محمد فتحى
تقبل مرورى وتقديرى

الشاعر سيد فاروق . أسيوط
ماعيطتيش
=======
ياحابسانى ورا السرداب،
بشوفك من شقوق الباب..
مع الاغراب!
تشاوريلهم على وكرى..
ألاقى الفكر ودا وجاب!؟!
يعيشنى ف خوف ورهاب
مانيش قاتل ولا هربان
ولاعقرب ولا تعبان
أناانسان
محاوطانى وحوش وغيلان
انا عاشق فقيرغلبان
تودينى ،تودينى لكون تانى
وسيع خالص مافيهش عذاب
تفوتينى تلاقينى
اموت ساكت
بدون اسباب
ده انا نبضك وتأييدك
وعمرى دم ف وريدك
دة انا الورد اللى فتح فى بساتينك
انا عنبك..انا تينك
انا كلمة ف تدو ينك
اناناسك ،اناشخابيط تلاو ينك
انابكره..انافكرةدواو ينك
ونقطةحبر ف دواتك
اناقلمك و فرشاتك
اناعصفورعلى غصنك
واناحامى حما حصنك
ف جاو بينى كفايه سكوت
مانيش هلفوت
بعلو الصوت أناديكى
ولاقيكى ما بترديش!!
أخضر بور أراضيكى
وأعيشك عيشة الدراويش
كده:تناتيش!!
و يبقا الحق و يايا
و يبقا الحب جوايا
و لا حتى تشاو ر يلى
شربت النيل ما شبعنيش
و غنيتلك مواويلى
و قلتلك:أجيلك و لاهاتجيلى؟
صرخ جيلى :
و قال حريه وعدالة
و قال :هنموت و رجالة
و قال :رجالةلوهنعيش
و قعت شهيد فدا عرضك
بدمى اتحررت ارضك
و حتى دموع مادمعتيش!!
وحتى عياط
ماعيطتيش!!
===================
25/9/2012
سيدفاروق
ديروط/اسيوط

» مختارات من الشعرالغنائى لمجموعة من نجوم الرابطة وتجدد
» مختارات من ابداعات الزجل لمجموعة من نجوم الرابطة وتجدد
» قبل ما تغضب للمشاركة فى مسابقة الشعر العامى
» مختارات من ابداعات الأعضاء فى الموال و المربعات والرباعيات
» مسابقة الشعر العامى من 15 فبراير الى 28 فبراير 2013 . احدى مسابقات رابطة شعراء العامية المصرية