قصيدة "القزينه" للمشاركه فى مسابقة شعر العاميه

وه ياقزينه
لساكى ببرده وطرحه وخال
وانا لسه بعِمه وعبايه وشال
والناس حوالينا بتتغير
والعمر اهو طال
والقلب الساكت
متكلمش
ولا.......طال
غير نُصة حُب
يطلع ع السلّم بشواله
ع الباب يتقاله ...
انزل...... طُب
دقيتى ...
ع الجسم الناحل
كام دقه
مين فينا اتنفس
من دنيته حصّل
خد حقه
طول عمرنا فاس
وهراويه حديد
لا بتكحت زين
ولا حتى بتبنى عمر جديد
بنهد اف روحنا
ومش بنحس
والعرق النازل متحجر
ع الجسم بيعمل
تمثال جبس
واللون
مجنون
مش عاشق غير ل ابيض واسود
مطرح متحدده يتحدد
وانا بتحدد
على نار من نار
والدنيا فى حياتنا ركوبه
نصها عربيه
والنص التانى
رجل حمار
يبقى احنا ازاى
عايشين ع الحد
مش قد الناس
ولا قدنا حد
حتى المدرايه مبتزيحناش
بايعين العمر بسعر كبيييييييييييييييييير
لكن ................ببلاش
والناس
ع القمره وبتشاور
وانا متجاور
لجالوس الطين
وامينه بتنحت فى عضامى
قدّامى ...
حلمين نايمين
متفوق ياقزين
العمر بيرحل
صفّر صفارته
وم الاول
مش هيرجع تانى
والطين م الاخر دور اول
مش دور تانى
العمر اهو عده
والخشم اتملى احزان وهموم
هتمطر تانى ...؟!
لاه...... م أظنش
مهو غيم ملكوم
من قبلى لبحرى بيتحرك
وانا بتحرك على لمبة جاز
والحلم يقولى ده ميجوزشى
وانا اقوله اهو جاز
والمخ الناشف متحجر
وانا متخدر
من غير دكتور
والضلمه تقولّى
اطلع ....بص
وانا اخاف م النور
ياقزينه انا برضه قزين
وبدايتى ونهايتى اتحطت
فى جالوس الطين
هنموت ......
من غير مهنعمل حاجه
ونعيش.......
وكإننا عاملين.

[b]

شكرا لك نجمنا الجميل
( الشاعر احمد رفعت احمد )
لمشاركتك فى مسابقاتنا الحالية
مسابقات رابطة شعراء العامية المصرية
ونتمنى لك التوفيق بالفوز والتألق المستمر
فلك محبتنا واسمى التقدير

[b]