عرفتى مين هم الجناه؟..................أيمن عبدالعالسلامة

الله يا مصر الله
الله عليكى الله
طول عمرك يا بلدى الحبيبة
وإنتى قاهرة للطغاه
أن الأوان يابلد
والفضل يرجع للولد
تعرفى مين الجناه
م اللى إشترى
ومين اللى باع
م اللى طق من الشبع
وساب ولادك جياع
سبحان ربى فى علاه
م اللى زرع قوتك يامصر
ومين جناه
اللى أمنتيه وخانك
أخطر عليكى م الغزاه
طول عمرك يا مصر دايما"
مستباحه ومبتلاه
عرفتى مين هم الجناه
إمسحى دمعة عنيكى
معنتش خايف عليكى
خلى تكالك ع الإله
وإرمى حمولك ع الولد
إبن الحلال اللى إتولد
من أم طاهرة
وأب معروف بالجلد
لما شاف دمعة عنيكى
حس بيكى وكان مدد
يومها راح نزل الميدان
والدنيا تاهت فى العدد
وبيسألوه أيه السبب
قال صبر مصر قد نفد
جوا الميدان
أبلغ لسان
صيحة زئير مليون أسد
صوتك بيدوى فى العنان
صوتك على صوتى سند
ترجع لنا تانى البلد
نزرع فى صحرة عمرنا
شتلة أمل
مافيش جريمة بتكتمل
والرب يفعل ما يريد
كلنا لله عبيد
تضغط على أصل الوجع
يخرج صديد
جرحك يطيب ويندمل
والدم يرجع للوريد
سبحان ربى فى علاه
عرفتى مين هم الجناه
.........................................