خاص بمسابقة الرابطة / محبوس جواكى / محمد عبد الرازق

(( محبوس جواكى ))

محبوس جواكى
و مش عايز أهرب منك
مغرم بهواكى
و مش قادر أبعد عنك
محبوس و الحبسة
مش شرط تكون بسلاسل
دى العين لو لابسة
الضلمة بحالها بتتراسل
و انا من كتر رسايلى
الدايرة فى كل الكون
داير ورا كل رسالة
زى المجنون
و الجن اما بيلبس واحد
عاشق مفتون
يتنطط بيه
و يزن عليه
و يحايل فيه
يتفرج على مسرح دنيا
بوشوش صافية و وشوش تانية
بتغير شكل و طعم و لون
فى الثانية ألفين مليون
و أنا من حظى و بختى الجاحد
جن جنانى أصعب واحد
ما بييأسشى
ما بيتعبشى
ما بيهمدشى
ما بيمشيش من طبلة و زار
صوتهم جامد
ما بيهداش
غير لما حبيبته تحن عليه
ما بيصفاش
غير لما ايديها يشدوا ايديه
فيقوم سارح بالشوق وياها
يملا صحارى الدنيا عمار
يتمرجح على لحن هواها
و العشق فى قلبه ملهلب نار
ليل و نهار
و أنا جنى احتار
حنى عليا ياللى عشقتك
قولى انك دايبة و عاشقانى
ده انا من بين الكل اختارتك
و دلالك يا حبيبتى كوانى
و اللى مصبر قلبى الفل
و مخليلى شوية عقل
إنى أعرف سكة عنوانى
محبوس جواكى يا ساحرانى
مع انى باموت فى الحرية
و اكره لو اكون محبوس ثانية
و صباع متكتف فى ايديا
لكن جواكى شىء تانى
بافرح و اتنطط عميانى
و أنا وياكى
باتنفس من نفس هواكى
محبوس جواكى
و مش عايز أهرب منك
مغرم بهواكى
و مش قادر أبعد عنك

العبد الفقير لله
محمد عبد الرازق