الزجال فارس القرشي مخلوق من حزن

[center]
مخلوق من حزن

جوايا حزن لو أتفرق
ع الناس هايغرق
كل اتنين
عايشين صافيين
في ألم وأنين
وهموم داخلين
مع لحمي ودمي
وفي التكوين
أصل الإنسان
مخلوق من طين
وانا بس لوحدي
بحس بأني تملي غريب
مخلوق من حزن
بشكل عجيب
باضحك للناس
والقلب حزين
وساعات …….
من نظرة عين الناس
باشعر بهموم
وبدمع وحيره كبيره
وعيوني بتغرق باكيين
مش عارف بس أزاي
أتعامل ويا الناس
علي أي أساس
وأنا فكري الكل
قلوب ألماظ !!!
وف لحظه باحس
بفرق كبير
وبالاقي الكل قزاز
وكمان يتكسر
علي رجلي وراسي
عادي ومتفسر
ما انا حزني وراثي
أرجع ودموعي جوه العين
أسئله باكيين
أنا فين ؟؟ أنا مين ؟؟
أنا واحد زي الناس !!
ما الناس عايشين
جواهم حزن .. لكن ناسيين
ليه بس ياقلبي
دايما فاكر حزني وتعبي
ومصاحب دايما دمع العين
طب أيه الحل ياقلبي
ما انت المسئول
أعمل درويش
أضحك وأقول
الحزن مافيش
الناس علي طول
هاتقول مجنون
عايش متغرب وسط الناس
علي أي أساس