الزجال فارس القرشي شيطان الأنابيب

[/center]





زوجتي الغاليه قالت جيب
بومبه من مخزن أنابيب
رحت لقيت الوضع غريب
وكأن الناس سردين مرصوص !

ولقيت واحد حالته صعيبه
قاعد يبكي بحرقه عجيبه
ويقول امتي املا الأنبوبه
لو بزياده أي فلوس

نادي عليه واحد متعافي
ومشمر دراعاته وحافي
رُكبه واصله عند اكتافي
وانا جنبه واقف ممصوص

خد أنبوبته وقال له أستني
اطلع من دورك واتهني
سيب النار وادخل ع الجنه
دا انا من غيري كنت تلوص

وف ثانيه جابله الأنبوبه
ماهي لعبه وكانت ملعوبه
فاز بيها وبقت سبوبه
وكمان أيده شبعت بوس

نط شيطاني وقال لي اتصرف
طوابير أيه!! أنت هاتخرف!!
خليك واقف حالتك تقرف
ويقرقض رجليك السوس

نادي من جوايا ضمير
خليك عايش مليان خير
واوعي تجور علي حق الغير
وما تسمعش كلام مدسوس

قلت خلاص خليني ف دوري
وباقول اوعي يانفسي تجوري
وتبصي لغيرك وتغيري
وتشمتي فينا الخلبوص

قال واحد فجأه : علي فكره
اللي ما خدشي يرجع بكره
قالها كإن الواحد نكره
ولقيت دمي صبح محبوس

ورجعت قفايا يقمر عيش
قالت فين .. انا قلت مافيش
قاللي حمايا هنا ماتجيش
دا انت طلعت صحيح موكوس

والليله قَضِيتها ف الشارع
لا كنيسه ساعتني ولا جامع
وشيطاني بيضحك وانا سامع
قلت الدنيا عبر ودروس

م النجمة جريت ع المستودع
قلت صاحبنا فين وانا أدفع
قالوا ادعيله يمكن يطلع
ف التخشيبه هناك محبوس

بالأنابيب خلقولنا الأزمه
شغلونا وكده من غير لازمه
والتجار اتربطت حزمه
واللي خلقها سابنا نلوص


[center][center]

الله تحفه يامعلم