قصيدة بحبك شريف عبد الفهيم

بحبك
----
بحبك موت
ولو كانت ما بينا بلاد
أعديها لسواد عينك
بحور الشوق أطوف فيها
واجيبلك من لآليها
وأغزلك كلام العشق
عقود ألماظ على جيدك تحطيها
بحبك مش كلام ينقال
دا إحساسي اللي ماليني
ولو وقفت ما بينا جبال
أكسّرها واعديها
يا عشق العمر والممنوع
أشيل همك وأفديكي
بروحي بس دي شوية
ولو كانت سمانا غيوم
أجيبلك منها نجماية
على صدرك تحطيها
يكون اسمي اتنقش فيها
ما أنا عاشق لإحساسك
وأنا الملاح في بحر هواك
ولو عايزة عروس البحر
أنا اصطادها واجيبهالك
ما انا عارف
دي لو شافت سواد عينك
تسيب البحر
ومش ترجع لأحضانه
أنا يا حبيبتي باندهلك
ومش عايز سوى حبك
ولو يا حبيبتي ما يكفي
أبيع أحلامي تاخديها
أنا مجنون بإحساسك
ومش عارف أكون سباح
في بحر عيونك الغرقان أنا فيها
بقيت غلبان في بحر العشق
وأنا اللي في قلبه عشت كتير كما القرصان
يا عشق الدنيا والآخرة
يا فجر الليل يصحيني بأحلامي
يعديني على جناحه لبر هواك
لا انا ملاح ولا قرصان
ومش عارف
هتخديني على جناحك توديني
لبر الحب واتهنى
واعيش في هواك في الجنة
ما انا أصلي هويت العشق في عيونك
وشوفت الليل في تكوينك
يتوّهني
وأتوه منك في إحساسك
أنا ناسك
ووناسك
ولو تبغي سواد عيني
أزين بيها تاج راسك
ولا أتأخر
حبيبتي عيونك النعسانة تأسرني
ولو ترضي
أكون كل العيون اللي
هوت قلبك وعشقوكي
أنا مسحور يا جنية
تاخدني تطير على المية
وأنا في العشق مش عوام
ولا باعرف أقول في العشق أي كلام
وساحراني
وأسراني
وأنا في الأسر باتمنى
تطول بيا لياليا
وانا في هواك كالمجنون
ياخدني الكون
لأحلامك
ومهما تطول لياليا
أنا عاشق في محرابك

» قصيدة ( بحبك يا بلدى )
» رفقاً صديقي . فصحى . شريف عبد الفهيم
» أغنية أعيش في هواك للآخر شريف عبد الفهيم
» قصيدة : بحبك
» قصيدة ( بحبك يا بلدى )