الشاعر حسن صابر - قصيدة (يوميات موظف حكومة)

يوميات موظف حكومة

منيش كسيب ولا دياولو .. ولا لى زبون عشان اقاولو
موظف كرشى قدامى .. واملى ف بكرة موش طايلو

باقوم الصبح من بدرى .. اقف ساعتين عشان اركب
وييجى الميكروباص اجرى .. غرامة ممنهاش مهرب

احضر نفسى فى الدفتر .. واجيب لقمة عشان افطر
وعندى ف مكتبى سخان .. عشان الشاى واهو يوفر

يجينى الشغل هو الشغل .. امقق فيه عنين اهلى
واسمع صوت اذان الضهر .. اقوم اتوضا واصلى

ويخلص يوم ييجى التانى .. وانا محبوس ف اشجانى
ملل قاسى محاوطنى .. وقلة حيلة شلانى

بكام ملطوش باقضيها .. تعاندنى واداديها
واحرم نفسى م اللذة .. وقال يعنى باربيها

واتارى الوهم دى عيشتى .. بلصم شرخ يا خيبتى
انا عايش وموش عايش .. ياريت يا عينيا ما شفتى

ايشى بورتو وايشى شروكى .. وسلطانى ومملوكى
وناس عايشة وناس بايشة .. وانا مستقبلى كروكى

هاتفضل دنيتى هي .. وهافضل روح بلا هوية
ونفسى بس قبل ما موت .. ماقفش طابور ف جمعية

موظف كرشى قدامى .. وتاهت منى احلامى
باقوم الصبح من بدرى .. وادينى باقضى ايامى
[quote]