مختارات من ابداعات الشاعر / محمد فتحى السيد

مختارات من ابداعات الشاعر / محمد فتحى السيد
رئيس رابطة شعراء العامية المصرية
____________________
النص الأول 1
سكـوت ح نصـوَّر
****************
سكوت ح نصور
كلاكيت أول مره
أكشن
سنانير بتغمز فى الممنوع
وشراع المركب مخلوع
ودراع القبطان مقطوع
فى البحر أغانى الفيديو كليب
سودانى ولب
تايهين فى ستاير حمرا
وازايز بيره وخمره
الموج شايل مايوهات
ع الرمله فخاد ونهود ستات
وحاجات مالهاش لزمه !!
الرقابه حذفتها
stop
سكوت ح نصور
كلاكيت تانى مره
أكشن
شباب جايين طايرين من ركن الكون
واخدين تصريح من مونيكا
لحماية النجمه الساقطه
فى الهيش العربى
stop
سكوت ح نصور
كلاكيت تالت مره
أكشن
سرطان الأوسط بيزيد
كلاب بتبيد حكام وعبيد
جنازات النمل طابوووووووووور
على باب الاقصى
الموت بريموت
الزيت مشفوط
خنازير بتحاكم برغوت
غرقنى طوفان الدم
وسحبنى الهم لقعر الكون
عفاريت اعلام طلعت لى
غنت لى
فرفش أربع عـفـَّر
خلى همومك تتشفـَّر
عبى الجردل من اوجاعك
فضى دماغك
ارمى الجردل بره الكون
stop
سكوت ح نصور
كلاكيت رابع مره
أكشن
فتحت دماغى
نطت اوجاعى فى حجرى
قروض ميسره
صناديق سوده بالصودا
قرارات مدفونه فى لحد
اتنين ــ اربعه ــ اتنين
كراتين لحوم مستورده م البوسنه والشيشان
وبلاد كتييييييير
ماركة ( لا اله الا الله )
كرتونه انفجرت من غزه
سقطت اشلاء
على عضم من البصره
وكبد وقوانص اطفال
stop
سكوت ح نصور
كلاكيت خامس مره
أكشن
عيون الدنيا معصوبه
والكفه مقلوبه فوق السكوت
الصمت موت
الموت بيسقط م الاباتشى والكروز
الارض احمر فى روز
الجثث زى الكازوز
من غير تمن
العز ... وز وألف كنز
تحت بيادات المارينز
تروس بتفرم البشر
فى الشوارع
فى المساجد
فى البيوت
الصمت موت
stop
عفواً
نلتقى الغزو القادمـ
______________
النص الثانى 2
لسه بتفرعن
__________
امون مطحون على خفرع
ومنقرع مديون فى حزمة البردى
ع الضهر حمل تقييييل
حط الحبين فى الأرض
النهر شق الخد
توت عنخ بيعيط
العين متكحله بالزيف
جوه الودان تخاريف
بين الحواجب خوفو حاجب الصوره
الأنف مكسوره
طرح اللسان صبار على شفه متشققه
نايمه السواقى ف العسل
والنبض واقف ع الهاويس
واحد يغيث رمسيس
رهنوا مسلاته ومن الميدان طردوه
حورس مع الكورس بيغنوا للعازفات
فينك يا موحد القطرين ؟؟
سايب نفرتارى تلعب ( اتارى )
ع المينا مينا مستنى المعونه
ايزيس مع اوزيريس الابره جنب الخيط
لا لحد يتأجر ولا توابيت
كل المقابر كومبليت
أحمس ادمن كليوباترا
وحتشبسوت محتاجه للقطره
ف علبه البيفى عالم هيروغليفى
بيذيعوا من حنطور
تايه رغيف حتحور
وحور على الحافه
يامنف فى الكفه
الوزن قل كتييييييييييير
سبع تلالالالالالاف كيلو ولسه بتفـرعن
ولسه هتفـرعن
________________
النص الثالث 3
على جسر القصيده
********************
لما العروض اختفت وغرقت البحور
حبيت اطيييييييييير
بدل ما امشى ع الرمل واكون عنيد
واشرب من البحر المديد
لفيت بعيد
وتوهت فى دروب الأدب
بين الحداثه والقديم مكانى فين ؟
حسيت الغربه سرقانى
رجعت تانى للبسيط
كأنى نقطه فى المحيط
جيش الحداثه هجم
برج الخليل اترجم
اتسربت منى القوافى
وماشى حافى
على جسر القصيدة
شاروت عقلى غيرت جلدى
ودعت كل الأعمده
ورحلت م البحر الطويل
على سفينة العولمه
______________
النص الرابع 4
سيف ع الف
____________
من الألف للياء حروفى متبعتره
عدادى راجع ورا
الضلمه خنقانى والشمس هربانه
من حطين وانا فى الطين
مسجون فى باترينه
ع الرف للزينه
اكتافى عريانه احشائى عطشانه
العوره مكشوفه والحلم متبخر
صورتى كلها عـزه لكن قديمه !!
صورتى الجديده
فيها النقطه مفقوده !!
نفسى اهرب واضرب اضرب
اقطع رقاب كل الكلاب لو حتى اتكسر
خايف اصدى من غير تصدى
عمرى يفوت وانا هلفوت
مخلوط هوايا بريحة الموت
_________________
النص الخامس 5
حبيبتى أم الكون
******************
من أول النشأه
كل القلوب عاشقه
حبيبتى أم الكون

فى الفنا التالت
فتحنا ع التالت
عيارنا كان فالت
حصلنا ميت مليون

خيرك يا أمى كتييييير
يكفى البشر والطير
وشبابنا أمله كبير
يقابل المأذون

ف الغربه والترحال
شابوا ولسه عيال
بيجمعوا فى المال
حتى ولو عربون

أكاله بطاله
والحاله بطاله
ولاحاجه منطاله
د القبر صار مسكون

ياجدى ياخوفو
ابنى اتولد شوفه
مكتوب على كفوفه
الطفل ده مديون

اسواقنا مفتوحه
لماريكا ولتوحه
ونفوسنا مجروحه
وعلاجها مش مضمون

مايوهاتنا بكينى
وشاينا من الكينى
وبضايع الصينى
من كل صنف ولون

ماليه حواريكى
طوابيييييير أهاليكى
والقمح امريكى
فى دقيقك المطحون

افكارنا مسروقه
احلامنا محروقه
فرحتنا مشنوقه
بحبل البنتاجون

من اول النشأه
كل القلوب عاشقه
حبيبتى أم الكون
_______________
النص السادس 6
عقارب الساعه
************
الساعه داخله على الفين !!
على المينا بتلف عقارب
ومافيش قارب فى البحر سليم
غير واحد بس مليان عفاريت !!
عــ الشط بتتمط البراغيت
وتنط شمال ويمين
العربى نايم على ضله
وخيال الضل مغطيه
بيحلم بالكون افراح
من غير مجروح
ولا طير مدبوح على اول قبله !!
ومافيش اسلاك
ولا رجل بتقفز من شباك
على طفل برىء !!
ولا ايد بتربط فى الاوتاد طوق المخاليق
ولا صرخه بتطلع مكتومه
من قلب الحفره المردومه بروث الخنازير
لاشريط بيسف
ولا بير بيجف
ولارفه ترف على الأوطان
***
الساعه الفين واتنين
الجو دمار والريح بتكسر الاستنكار
والشوك من قلب الورد يفوت
الشجب يموووووووووووووت !!
عــ العربى بتتلم البراغيت
من غير تصويت
ولا أى عبيط يطلع بقرار
السما بتعتم عــ الأخبار
وماعدش نهار بيبوح
الليل بيخبى الشمس فى حجره
وبــ رجله يشوووووط الحلم بعيد
***
الساعه الفين وخمسه
الضلمه الدامسه بتمد مجالها
وتفوت عــ المادنه تهد هلالها
وتبكى عيالها
ارهاب مشروووع
بيشفى ضلوع ورقاب
وزعيم مخلوع من بعد ما داب
***
الساعه الفين وسته
العـــــــــــــــــــــــالم سلطه
والشله الساقطه لساها قويه
بتقول للعربى شوف الأضحيه
على الباب الشرقى
كل عام وانتم بخير
جاى لسه كتير للعلم
والعربى غرقان فى الحلم
_________________
النص السابع 7
فارس الأحلام !!
******************
الخيط الأبيض يلمع فوق
ست الحسن تفوق
الميه تطلى سحرها
مين قدها ؟؟؟
وعيون مها جوه المرايا ملحمه !!
الشمس طلت م السما
تشبه خدودها وثغرها ونور سحرها
تشيل مناديلها _ تطفى قنديلها
تهرب من العشه
تطوى خطوتها الشوارع
تتوه فى زحمة الميادين
تلتهمها كل عين
الواد يرقص الحاجب
يشجب الشايب
البنت تتدلل
خاليه الشوارع م الفتات
زحمه الاهات
اغصان تودع فى الورق
عصافير البطن بتصوصو فوق الرصيف
يسكتها الرغيف
يشتد عودها تطوف
الأمل ملفوف بخوف
م الحلق طالع صوت جميل
ينادى ع المناديل
الشمس تهرب م السما
الليل بيحزن انما . الوقت فات
ساعة الرجوع تخنق متاعبها الخطاوى
وساعات تلبخ فى الدموع
الفول بيقتل أى جوع
صعبه الساعات لما تطول تحت الغطا
الخطوه بكره ملخبطه
ضاله الطريق
النوم جرئ . سمكر عيون المها
فى الحلم سقَّط قلبها الفارس المجهول !!
على هامش البساتين جاى بالفرح طيران
فرش السنين ياسمين
على اليمين . الورد يضحك للهوى
على الشمال . الحور بتندب حظها
ابليس بينحت فى الطريق حبة حفر
اعوانه بيحشوا الأمل
جنح الحصان . فلت اللجام
فارسها واقع فى الملل
جيوبه فضيت م الدفا !!
اتسربت فيها الرطوبه
جمدت كل المشاعر
ماعدش شاعر بالشروق
الخيط الأبيض يلمع فوق
ست الحسن تفوق
تطوى خطوتها الشوارع
تتوه فى زحمة الميادين
وتعود فى اخر الليل
بالدم فوق منديل
ينعى انوثتها
ويلعن فارس الأحلام
__________________
النص الثامن 8
مقلب زباله !!
*******************
مليون صنم اختصاص اخر علام
واقفين طابور عمال يدور حوالين مقام
دى قوه عاميه قرع باميه الكل نام
مابين خيوط العنكبوت
بناطيل ......و...... جيبات
متعفرين بالتراث
وفوق راسم خطوط ///////////
ونقط ...........................
وعلامات استفهام ؟؟؟؟؟؟؟
وقف الرصيف انتباه
والعمر بيجرى سريعا مرش
جلابية ستى مقلوبه على كتفى
بكمامها العقده وشنيطه
(ارشيف عمرى متلخبط )
شهادات .. احلام
وكرامة عليها زبل فيران !!
زبال همسلى فى ودنى
ارمى زبالتك يا ابنى
عينتك عندى
قلبت جلابية ستى .. نفضت كرامتى
حطيتها فى جيبى المخروم
وبدأت الملم
تحت العرق
ايصالات على كمبيالات
عقود عمل عرفيه
محاضر اداب
ورق بفره
اعلانات تمليـك ( مش ليك )
فوق الرصيف
زهور بلاستيك
ازايز . ودان . قلوب بلاستيك
جنب الرصيف
اكياس بلاستيك
مكتوب عليها ( كفايه )
علقت المقطف
ومشيت ورا الحمير من مقلب لمقلب
تحت اكوام الزباله الارض بور
سالت دموع العشش طرحت قصور
طلت من الشرفه الكبيره
افواه كتيره
ت
ف
ت
على
الزبله
_________________
النص التاسع 9
أبيض ياورد
**************
أبيض ياورد
*************

فى حضن الفل والياسمين
( قشطه وحليب )
لون قلب أبويا بتاع زمان !!
لون دعوة أمى الطيبه
ساعة رضا
لون الندى
( من غيرشوائب عالقه )
أبيض ياورد
لون الضمــير .. من غيرعيوب
وبسمة الطفل البرئ
( من غير ذنوب )
بدر فــ تمامه
يهدى كل العاشقين جرعة أمل
بعد الغروب
أبيض ياورد
تشبه جيوبى البردانين !!
لون السما فى عيون حبيبتى
توب زفاف فجرى الجديد
حلمى الوليد فى الشرنقه
صوت الاذان
يفك حبل المشنقة قبل السجود !!
أبيض ياورد
تشبه ضفاير جدتى
ووحدتى وقت الخشوع
لون الدموع فوق الكفن
ع القبر نورك راح يزيد
فتح قووووووووووووووى
ت
ح
ت
ك
شهيد
____________
****************
رباعيات سياسية
*****************
1
يا أمه يا مدرسه فيــها الفصــول بتبوش
اتهدت الاسوار دخلوا الكلاب فى الحوش
خافوا الاســاتذه من الضـــرب والبهـدله
لما زميلهم وقع مابين صـــــــوابع بوش
____________
2
يا أم الهـرم والنيل والحسن بيكـــهرب
عايش فى حضنك عليل وكأنى متغرب
بتدلعى الاغـــــراب دايمــا ونسيــانى
واحاول اهـــرب منك القــانى بتقــرب
___________
3
ملايين بتصرخ من قلة الرحمه
لاطايله سمكه ولا فرخه ولا لحمه
حتى الرغيف المبعكك صعب المنال
علشان تنوله لابد الحرب فى الزحمه
_____________
4
كل العيون نامت وانا وحدى ليه سهران
بحلم ببكره سلام مع انى وسط نيران
والدم غرق لنا مصاحفنا والصلبان
اكفينا شر الفتن يارب يا رحمن
_______________
5
مهما يعلوا السور ويبنوا بينا حيطان
ويكشفوا المستور ويزيدوا الاستيطان
بكره الأمل بالنور ياقدس يجمعنا
نتحدى أوجاعنا ونحطم القضبان
_____________
6
ياما فيه كتير أفكار محبوسه فى الأدراج
والهم كان دمِّـل أصبح كده خًـرَّاج
بيرفعوا الهلفوت والمبدعين فى تابوت
وادى الحياء بيموت ومعدش فيه إحراج
_______________
7
لملم فى اشلائك واشبع بُكا ونواح
لادمع يمحى حُزن ولايرجع اللى راح
كفايانا صمت وشجب والرقص ف الأفراح
يا أُمَّه متفككه م تعيدوا مجد صلاح
_____________
8
حامت على راسى طيره بلا طيار
صوتها بيزعجنى ويشتت الأفكار
لا عينى بتشوفها ولا رصدها ردار
فجأه لقيتنى بموت والدنيا صبحِّت نار
_____________
9
ناسك باعوكى حبيبتى بس انا شارى
بزرع فى حَبك وحُبك فى الحشا سارى
حزين عشانك وشانك فيكى فساد جارى
بيجنوا وردك وشهدك واجوع انا وجَارى
________________
10
اعوام كتير عايشين على الأوهام
والكون بيجرى وإحنا لسه نيـام
اللى بيسرق واللى بينافق الحُكَّام
كل ما نحلم بأفضل يقتلوا الأحلام
_________________
11
ياقلبى حزنك خساره على اللى بالظلم راضى
ساكن قمقم فى حاره ولغيره الكون فاضى
يسد جوعه بلقمه ويروى عطشه بدموعه
لاتوب يكسيله عَوره ولا فَرشه ترحم ضلوعه
________________
12
هو الأمل راح فين ؟ ليه الطريق انسد ؟
الفرح عمره يومين والحزن مالوش حد
الدمع سال م العين جرح الجبين والخد
والشوك على الجانبين غارس فى قلب الورد
______________
13
رحلت غيوم السما ونزعنا كل الخوف
اليأس تاه عننا صارت امالنا سيوف
ضد اللى خد مننا المليارات وألوف
رجعت بلدنا لنا صبح الفساد مخسوف
_____________
14
قد اللى فات م الذل والقهر والسرقه
هاصرخ بصوت عالى واقولها وبحرقه
اصحوا ياناس م النوم دى المركبه غارقه
زيحوا ستار الليل الشمس اهى شارقه
_______________
15
نور الأمل طالع بيقول ياحريه
كل الفساد واقع يا أمه عربيه
ادى الشعوب ثارت والثوره سلميه
الأوله ف تونس والتانيه مصريه
________________
16
يا ألف رحمه ونور ع اللى زاحوا الستار
شهدائنا فى التحرير على قايمة الثوار
هما اللى فتحوا الباب خلونا اهوه احرار
يارب اكتب لهم فى جنتك ابرار
_______________
17
سرق الفساد عمرى وسوِّد الأيام
نيمنى فى قهرى صحانى ع الأوهام
قيدنى فى جحرى وعتِّم الإعلام
وبعد طول صبرى هاحقق الأحلام
________________
18
نام الفيران فى الجحور من صيحة الثائرين
أصبح جمال طرطور وعلاء ياناس مسكين
راح نكشف المستور وسوزان توفى الدين
صفوت نظيف وسرور والغالى بطرس فين ؟
_____________
19
رب العباد يمهل لكن بدون إهمال
والعز لو يهبل مالوش لزوم المال
والكرسى لو طوَّل لابد يوم تنشال
والدنيا تتحول أصل دوامها مُحال
______________
20
ردوا الفلوس لينا يامرجعين الحقوق
الصبرفاض بينا عاوزين شوية ذوق
لجل المريض يشفا يصحا كده ويفوق
واللى اتوحل فى الفقر يطلع يقب لفوق
____________
21
نام الفيران فى الجحور من صيحة الثائرين
أصبح جمال طرطور وعلاء ياناس مسكين
راح نكشف المستور وسوزان توفى الدين
صفوت نظيف وسرور والغالى بطرس فين ؟
___________
22
رب العباد يمهل لكن بدون إهمال
والعز لو يهبل مالوش لزوم المال
والكرسى لو طوَّل لابد يوم تنشال
والدنيا تتحول أصل دوامها مُحال
___________
23
ردوا الفلوس لينا يامرجعين الحقوق
الصبرفاض بينا عاوزين شوية ذوق
لجل المريض يشفا يصحا كده ويفوق
واللى اتوحل فى الفقر يطلع يقب لفوق
_____________
24
دقت طبول الثوره بإيدين شباب أحرار
فتحوا بيبان النور وفتشوا فى الأسرار
قام اللى كان مقهور ماهمه ضرب النار
قرر يعيش راجل يايحَصّـل الأبـرار
_____________
25
ظات الفساد لعقود خنق الغصون ع الشجر
الشعب يزرع بجود وهوَّ يجنى الثمر
يقول كلام ووعود هانصلح اللى انكسر
أمل الشباب مفقود من كُتر صبره انفجر
_____________
26
بات الشريف مسجون باتوا اللصوص بره
بيغـرقـونا ديـون والعيشه كات مُـره
نشقا نلف الكــون ف الغربه يا حسره
ياسارقين بجنون نسيتوا ليه الأخره ؟
___________
27
شرفتوا مصر بجد يا أجمل شباب الكون
الضعف بيكوا اشتد صحيتوا كام مليون
بيت الفساد اتهد عــ الحاكم المفتون
رسم الشهيد المجد والدم كان بيهون
___________
28
نادى الشهيد أُمى واحد وعشرين مارس
ماتحمليش همى ابنك بطل فارس
وماتمسحيش دمى انا بالفرح حاسس
يامصرنا هِمى وامحى الفساد خالص
_____________
29
صعب الشعوب تسمع لأى حاكم صوت
لو بالديوك يدفع يقتل لُه كام كتكوت !!
لابد يوم يرجع يصغر كما البرغوت !!
صعب الفساد يقمع صعب الأراده تموت
______________
30
رفرفت روح الشهيد صحِّت قلوب خايفه
قالت لهم من جديد انا فى النعيم شايفه
رجال قلوبها حديد كانت لهم واقفه
واللى استخبوا بعيد أكيد دى ناس هايفه
________________
31
لالا يازمن الظلم لالا ياوكر اللصوص
احنا بسلاح العلم هنعدى فيكوا ندوس
اصحوا بقا م الحلم هاتوا الدهب والفلوس
السلطه صبحت وهم وحياتكوا صارت كابوس
_______________
32
رفع سكوتنا ناس كانوا زمان واطيين
ملكوا الدهب والماس واحنا اتغرزنا ف طين
اللى اشتغل كناس واللى مع العاطلين
شربنا مُر الكاس ياظُلم أخرك فين ؟؟؟
________________
33
رحلت طواغيت فسادها ومصر غيرت توبها
وكل شهيد من ولادها نور عينها محبوها
طهَّر بدمُّه ترابها وأمله تمحى عـيوبها
فـتَّح جميع أبوابها للى داستهم كعـوبها
ــــــــــــــــــــــــــــــــــــــــــ
34
ريح الغضب جامده وشديده بـ الـ لمه
كل الشباب صامده بيزيحوا فى الغُمه
روح الشهيد صاعده بتـنـوَّر العـتمه
كونى يانار بارده على مصر والأُمه
ــــــــــــــــــــــــــــــــــــ
35
رن الجرس مُنذر لكل حاكم طاغى
مُتعالى مُتكبر لحقوننا مش ساعى
فى بلادنا بيدمر هُوَّ وشلة أفاعى
الشعب لن يغفر لو كنت يوم راعى
ــــــــــــــــــــــــــــــــــــــــــــ
******************
رباعيات متنوعة
*****************
1
ليه شكلى عامل كده قوليلى يامرايا
وشى كتاب مفتوح والجسم برايه
نظرات عيون الغرام سابت ف قلبى الم
وكل سن اتقصف ساب نقطه جوايا
____________
2
هاكتب اللى جوايا بصدق وجد
واطلع اللى فى حشايا لأبعد مد
أضفّر م الحروف مدفع يقول الحق
ويهدم قلعة الظالم ويبنى المجد
______________
3
بحب كل البشر من كل جنس ولون
لوكانوا أُدبا وشُعرا أهل ثقافه فنون
قلبى أكيد هايسعهم لوكانوا ملو الكون
وأعشق أكيد إبداعهم لوكان هبل وجنون
_______________
4
كتبت مشاعرى بمدادى وبالفرشه مع الألوان
وتوهت فى مجد اجدادى و عهد العزه والفرسان
اشق الصحرا والوادى وادورلى على عنوان
لقيت الغربه فى بلادى لقيت الذل بالألوان
________________
5
رد السلام ده فرض يـاحلـو ليه تقلان ؟؟؟
الحب جابنى الأرض أصبحت فيك هيمان
انت الوحيد فى الأرض اللى احتواك قلبى
ياهل ترى ياملاك هاتحن ع الغلبان ؟؟؟
________________
6
رحلت غيوم السما لما بدرك هل
كل الحبايب فرحوا أما العزول إنذل
ريحة الوجود فى لقاك ياسمين ومسك وفل
حضنك حنان وأمان قلبك يساع الكل
_____________
7
دور على الإبداع أكيد هنا تلقاه
معانا تلقا الهنا و بينا تنسا الاه
صحبة زهور كلنا فاحت عبير ( الله )
اللى معانا اتولد واللى فارقنا تااااااااه
_______________
8
تعرفوا تقيسوا سعادتى لو تكون الفرحه سابقة ؟
قلمى ينزف من مدادى والحروف تلقاها سارقه
كل احاسيسى ومشاعرى كل تفكيرى العميق
فى الأدب اصبح غريق جوا أحضان المسابقه
_______________
9
أنا ماشى على الهامش
لا أنا مفتّح ولا رامش
تايه فى السنين مطحون
وميت بس اهوه عايش
______________

[b]

» مختارات من ابداعات الشاعر / محمد فتحى السيد
» الشاعر محمد فتحى السيد والشاعرة جيهان فتحى فى سجال عيون القمر . وآراء النقاد
» إعدام قلب كلمات الشاعر محمد فتحى السيد قراءة تحليلية الشاعر خالد عز الدين
» إعدام قلب كلمات الشاعر محمد فتحى السيد قراءة تحليلية الشاعر خالد عز الدين
» أهداء من الشاعر محمد سعيد للشاعر محمد فتحى السيد