مشاركة الشاعر خالد عز الدين بامسابقة الشعر الغنائي 1- شموع رمضان ... 2- نبض الحياة ... 3- أنا أحبك

1- ( شموع رمضان)

الشمع ينقص لما يقيد
وأنت اللي شمعك نوره يزيد
هليت علينا كام مرة
لكن تملي جديد ف جديد
يكفى إن وأنت مودعنا
بتسيب ف بيتنا ليالي العيد
******
نورك معانا يوم ورا يوم
إن كان صلاة أو ذكر وصوم
فانوس ف حارة فانوس ف الإيد
وكل مرة جديد ف جديد
يكفى إن وأنت مودعنا
بتسيب ف بيتنا ليالي العيد
******
جاي بالحنان أشكال وألوان
من عند مولى كريم رحمان
ومن الذنوب تتركني وليد
كأني جاي الدنيا جديد
ولما تيجي تودعنا
بتسيب ف بيتنا ليالي العيد
******
خالد عز الدين
***********************************************
2- (نبض الحياة)
نبض الحياة بيناديك
لسه الأمل بين إيديك
ما تقلش صعبة الحياة
**
مهما تكون مؤلمة
ارفع إديك للسما
ونادي يا الله
**
تلقى الإله يسعدك
ولا حد يستعبدك
وتحس نبض الحياة
**
عيش حر قول كلمتك
دا اللي زمان سكتك
الخوف يا صاحبي ملاه
**
شعبي لا يمكن يخاف
وإن شالله ياكل حاف
والرب يتولاه
**
وف مشهد التحرير
الناس هناك طوابير
خرجت لوجه الله
**
كفك ف كف أخوك
واحذر من اللي خانوك
حقد السنين جواه
**
اصرخ وعلّي الصوت
ما تخافش يوم م الموت
ما احلا الشهيد محلاه
**
الشهدا ناس عايشين
عند الإله راضيين
وما يعرفوش الآه
**
خالد عز الدين
***********************************************
3- (أنا أحبك)

أنا أحبك وأنت تحبيني
ورسمت حروفك بيميني
لو ليل الغربة يفرقنا
فجر الأحلام ح يجمعنا
وضروري ح اجيلك وتجيني
أنا أحبك وأنت تحبيني
******
أنا شفتك نور ف جبين بُكره
وأمل شايل أجمل ذكرى
لو أنادي ما تسمع أيامي
أو تهت وتاهت أحلامي
راح ألاقي ضياكِ بيهديني
أنا أحبك وأنت تحبيني
*******
يا عيون سهرانه بتستنى
والقلب يا روحي بيتمنى
إن الأيام يوم تصفا له
ويشوفك يا حبيبتي هلاله
من نبع حنانك ترويني
أنا أحبك وأنت تحبيني
*******
حبيني ولكن من قلبك
علشان أنا هوه اللي بحبك
لو عايزة دليل على إحساسي
فيه إيه أكتر من إخلاصي
يا اللي أنت غرامك يحيني
أنا أحبك وأنت تحبيني
*******
خالد عز الدين

يمكنكم متابعة أغنية شموع رمضان على هذا الرابط

» عمري ما هنسى - الشاعر علاء أبوذكري ( للإشتراك في مسابقة الشعر الغنائي ) المسابقة الكبري
» أهـ من شقاوتك ------ مسابقة الشعر الغنائي 2011
» قصيدة لازم نصحي للشاعر محمد رمضان شفيق..مسابقة الشعر الغنائي
» الشاعر خالد عز الدين
» الشاعر خالد عز الدين