مشاركتي بمسابقة يناير 1- طيف ..2- سؤال.. 3- واحد صريح

1- (طيف)
تعمل إيه
لو تبص ف المراية
تلقى طيفك مش مطاوعك
تلقى شخص غريب
يلاوعك
تلقى روحك مش سعيدة
والليالي ليه بليدة
حتى صورتك ف المراية
بقت عنيدة
واختلف لونك وطبعك
***
السنين مرت عليك
سرسبت من بين إيديك
بس سيبالك أمارة
شخص تاني ف المراية
هوه ديما كان معايا
بس ما عرفتوش زمان
كان حنيِّن كان أمان
كان متابعك
***
خبي دمعك داري جرحك
رُوح وصالحه
شوف ملامحك شوف ملامحه
الأمارة اللي الليالي سابتها ليك
زي ما تكون بتناديك
هيه مرسومه ف عنيه
ولا ف عنيك
وإن قبلت ورحت ليه
هوه يقبل يوم
يسامحك
***
يا اللي طيفك أنت طيفه
ليه تلاوعه
لو يشاورأبقى طاوعه
هوه عارف وأنت طايش
أنت ميت هوه عايش
خلي طبعك زي طبعه
من هنا ورايح تتابعه
***
خالد عز الدين
*************************************************
2-(سؤال)
ممكن سؤال ...
ليه مش مصدق
إنْ أنا ...
ما بقتش أخاف؟
علشان سكت سنين طوال
ما أنا كنت خايف ع العيال
مرتْ عليَّ سنين عجاف
مش لاقي زادْ
حتى الولادْ
بيموتوا م الويل والعنادْ
ويقولوا عالْ
وبكرة تحلو الأحوالْ
ولما بكره غيابه طال
والموت بيحصدهم آلاف
ما بقتش أخاف
***
ممكن سؤال
ليه مش مصدق
إن أنا...
ما بقتش أخاف
لو مرة كلب يعضني
صدقني
من سنتين جَــريت
بس النهاردة
ولا ألف كلب
يهمني
غايته
يهبهب حبتين
آخر حكايته
ينهش له عين
ويشوف زي ما غيره شاف
إن أنا ما بقتش أخاف
***
ليه مش مصدق
إن أنا...
رَجّـعْـت صوتي
من جديدْ
وبقيت أغني
بقيت سعيد
وبقيت أَخوِّف ألف واحد
م اللي شايلين البنادق
واللي نايمين في الخنادق
واللي لابسين الحديد
حاسس بإني بقيت قوي
قوي قوي
وقت أما مُت
هناك شهيد
***
خالد عز الدين
**************************************************
3-(واحد صريح)
(1)
لا عمري خنت
ولا أعرف أغش
أو لما أقابلك ألبس وش
أنا لما أحب
أحب بجد
ولما أخاصم ما أديش وش
******
(2)
لو كنت ح أزعل منك يوم
راح تلقى مني عتاب أو لوم
مش وأنت غايب
أقول وأعيد
ولما أقابلك منك أكش
أنا لما أحب
أحب بجد
ولما أخاصم ما أديش وش
******
(3)
ما أعرفش أغني
وألف وأدور
وأعيش منافق
وأشهد زور
وأقول فلان راجل مظبوط
وهوه عايش غش ف غش
أنا لما أحب
أحب بجد
ولما أخاصم ما أديش وش
******
(4)
وأعرف أجامل كل الناس
وأقول كلام صادق حساس
مش ألف ليلة وأقول حكايات
وآكل ودانك
لت وأدش
أنا لما أحب
أحب بجد
ولما أخاصم ما أديش وش
******
(5)
وإن كان كلامي مهوش بصحيح
بينا الليالي
سكاتها فصيح
إكمن قلبي تملي صريح
ولا يوم بتغويه المراجيح
الحق صاحبي وآكلها بمش
أنا لما أحب
أحب بجد
ولما أخاصم ما أديش وش
***
خالدعز الدين

الشاعر الجميل خالد عز الدين شكرا لك على مشاركتك فى المسابقة
ونتمنى لك التوفيق والرقى المستمر
لك محبتنا وأجمل الورود

» فــــــــــــــــــــــــــلاح.............خاص بمسابقة شعراء العاميه المصريه
» خاص بمسابقة الرابطة / محبوس جواكى / محمد عبد الرازق
» شروط مسابقة يناير 2012 للشعر الغنائى من فضلك التزم بها
» قصيدة "" خمسه وعشرين يناير "" للشاعر ابراهيم بيومى محام بالنقض
» قصيدة واحد صحيح