الشاعر/ محمد اسماعيل

كوسه
كلامنا عن اكله ف بلدنا
بتتعمل محشي في صنية
اكلة تكبر بيها مخك
اكلة تتخن بيها كرشك
لو سارقلك كام سريقة
كمان تشيل المسؤلية
ممكن توظف بيها ابنك
ممكن تنظف بيها اسمك
ممكن تخلي القاضي عبدك
كمان تكسبك القضية
ايوة كوسه كلامنا عنها
واي حوسة هتبقي منها
تعلي واطي توطي عالي
كلامنا طال المحسوبية
-علي جنب ياسطي
=الوقفة هنا لازمها وسطة
- قلت له حتي ف دي كمان
= قام قالي طابعا شوف عساكر ياما واقفة
تكتبك علي طول مخالفة
لو مرشطش الاوبيج او عارفلك اي سلطة
انا قلت كوسة
والكلمة كانت اللي هي
كل اللي كان في الميكروباص فاهم وعايش القضية
الكل شارك في الحديث
اللي قالك لاء دي فردة
واللي قالت شئ يغيظ
واللي قال حمادة ابني سقطوه في المدرسة
مع ان كان الواد مذاكر
الواد بطبعه اصله شاطر
كان بيسهر ياما يقرا بالخصوص في الهندسه
بس هعمل ايه دي كوسه
المديرة بتاعته سوسة
كانت طالبة مني خدمة ميري
اقضيهلها من مديري
ومن غبوتي وصغر عقلي قلت لاء شوفي غيري
وجت يا سيدي في المدرسة
قالت دي فرصة كويسة
تنتقم مني ف حماده تعيش عليا المريسة
واللي قالك جيت ف يوم
قلت اجيبلي كام رغيف
من الطابونة اللي ف شارعنا
قلت انادي الواد شريف
- روح يا واد هتجبلي عيش
= قاللي لاء متهدنيش
-روح يا واد لهقول لابوك
= قالي قول ميهمنيش
قلت اقوم اجيب لنفسي
قبل ما تتسد نفسي
فيها ايه طب لما همشي
خطوتين وهكون هناك
المهم قمت واقف في الطابور
وبرزالة خدت دور
بالمعاندة والمعكفة الاقي وشي في وش طور
قلت هاتلي بريالين
قاللي اجيبلك عيش منين
روح خلاص شطبنا يالا
هي دي بقت المعاملة
جي يطلع فيا همه
جته نيلة ف تقل دمه
ضيع املي ف غمضة عين
فجأة لقيته طالع بالراحة
وبيتسحب مع قفصين
وادي لواحد واقف جنبه
م العيش دووت يجي عشرين
قلتله بس افشتك كبسه
رايح فين بالعيش يا حبيبي
قاللي يا شيخ روح كده بلا وكسه
كبسة ايه الواد ده قريبي
قلت ف بالي برده الكوسة
تلعب دور ف حتت محسوسة
بقي برده عشان رغفين يسطي
لازم كوسه ولازم وسطة
وانا راح اجيب الوسطة منين
واللي يقول له بس ازاي
يدي لواحد غيرك عيش
ده انت خلاص كان دورك جاي
يعني خلا الذمة مفيش
واللي يقولك برده اهو لازم
جنب الكوسة شوية سلطة
راح نفضل عالحال ده مواسم
طول مالناس مكفية وساكتة
واللي قالتلك برده اجددنا
قاله عليه في المثل اكمنه
اللي ليه ضهر يا ناس في بلدنا
عمر ما حاجة هتيجي ف بطنه
اه بالحق انا كنت نسيت
المفروض انا كنت نزلت
ايه خلاني بس اتعكيت
في الموضوع وانا عندي الضغط
قلتله يا اسطي خلاص نزلني
وقمت مشاور للتباع
قال لي دماغي هتفرتكني
روح جاك غورة جبتلنا صداع
قلت له شكلك كده مجنون
اسكت لطلع عالكراكون
واعمل محضر للعربية
وهقول خبططني ف رجليا
ويجي الونش وهيجرجرها
قال لي كلام في كلام واونطة
يابني صاحبها ده امين شرطة
وانا يدوبك بس بسوق
لو يجوا ف مرة ويخدوها
بكتيرو بكرة وهيخرجها
قلت له بس اهي دي الكوسة
شوفتوا يا سادة معني الحوسة
اللي تخلي واحد زيه
يجي ف وشي ويصدرها
قالوا يا سيدي خلاص معلش
برده الراجل ديقه الوش
قمت مشيت حفظا لكرامتي
بدل السواق ميبعترها
قلت اروح بقي عالبيت
مش هتصدقوا اني لقيت
الست مراتي واقفة بتطبخ
في ايديها كوسة وبتقشرها

فلسفة....أنا


أنا......كلمه ف معني الكون
أنا....بكره اللي مش هيكون
أنا.........عاقل و مش موزون
أنا مجروح قوي بحزني
عشان فرحي...طلع مجنون
....................................
أنا في العتمه اكون شايف
ومش خايف....لكن مرعوب
أنا ف نهاري مش طايق
عشان فايق....لكن مغلوب
ومش ناوي ف يوم اكسب
عشان مش ناوي يوم اكدب
وقالوا: تهون ما بين ليله
شروق وغروب
أنا قلت: ماهيش فارقه
كده سودا...وكده زرقه
لاموت حر...لاعيش مصلوب
......................................
أنا............................ميت
أنا..........................مفقود
أنا هتشوفني تلقي سراب
تقربلي مانيش موجود

قصة محامي

السلام عليكم
ورحمة الله وبركاته
علي اللي زمان
كان افوكاته
يدور معايا
قدّامي و ورايا
علي الحقيقة
كانت دي سماته
كتر القضاية
ويّا الصباية
شألب حياته
شاف المحزق
شاف الملزق
بدل صفاته
يصرف يبعزق
علي دي يشبرأ
بدل ما يجمع
يابني ده جنس
عمره ما يشبع
مهما تجيبله
ياخد ويبلع
يلبس ويقلع
ياكل ما يشبع
يجوز و يخلع
حتي التراب
ما يملي عينيه
وآدي اللي كنت
بقول لك عليه
جي لي تعيط
واعمل لك ايه؟
ما انت اللي دايما
كنت الحمار
قعدت تقول لك
طبلة و زار
عفريت دا مين
يسكن ف حرمة
هو العفريت
كان يوم عبيط
كانت حياتك
دايما هزار
تخرج تنام
تكتب كلام
تاخد قرار
قلبت بجد
طول النهار
سفرا تلمع
بامية تقمع
واجب تسمع
والآخر تقول لك
اكنس دي ليا.
لما قالت لك
الشيخة هيّة
اللي تطلع اللي عليا
واصلة وعفية
قادرة وشقية
مبروكة هيّة
اللي موصوفة ليّا
والله ما مبروك
غير علي الولية
اللي هتهبر
منك هباير
حمل وشيل
زي اللي زاير
و من الفلوس
عبي ف شكاير
للي هتخرب بيتك اكيد

آخر الكلام
هو المفيد
و آدي المحامي
بقي الفقيد
ورثت فلوسه
خفت اكيد
و آدي حياته
ما كت تزيد
علي اللي كان
مربوط ف ساقية
لما قالوا لها
قالت ف داهية
خلوني أدورعالجديد
وآدي سلامي
هو ختامي
علي اللي كان
ف يوم محامي.