الشاعر / علاء أبوذكري

شيكا عالعالي
------------------
شيكا عالعالي ........ شيكا عالواطي
ليه الشعب العربي مطاطي ؟
ليه كلمتنا مش مسموعه !
ليه لقمتنا مش مبلوعه !
لاجل سُؤالنا هنعمل قمــة
و اللي يعدي يروح عالإمّه
لاجل القمه هنسأل تاني
واللي سَامعنا يقول للتاني
شيكا عالعالي ........ شيكا عالواطي
ليه الشعب العربي مطاطي؟
رد معاطي الديموقراطي
يمكن دِسك من الأرضية
يبقى علاجة شوية مَيّة
ويريح حبة الصُبحية
ولا نجيب له سلاح مطاطي ...
نضرب فالعالي وف الواطي..
شيكا عالعالي ....... شيكا عالواطي
ليه الشعب العربي مطاطي ؟
قال العم كبير العيلة
صاحب القعدة وصاحب الليلة
يمكن قَفشه من الحلزونة
اللي جريرها وهاتك لف
ولا تكونش الحلوه معونة
اللي شايلها ووّاخد كف
قام الزول بسلامتة يقول
يمكن دَعوه علية جايه له
عايزه تخلي جنوبة شماله
لف الدور على عم زناتي
شايل كيلو ونص زبادي
داهن وشه وسايب عشه
قاعد ويّا عدوه ليلاتي
واكل أكله وفاكر شكله
جاب له كباب من عند الحاتي
سأله الكُل سؤالنا الأتي
شيكا عالعالي ..... شيكا عالواطي
ليه الشعب العربي مطاطي ؟
رد بسرعه العم زناتي
يمكن وعكه من الأسياد
يبقى يلف سبع لفات
قال العم أبو عِمه وشال
صاحب العِزه وصاحب المال
يمكن طَاطَا من البَرّيمْه
وإحنا عشان نيتنا سليمه
يبقى عرفنا سؤالنا الماضي
شيكا عالعالي ........ شيكا عالواطي
ليه الشعب العربي مطاطي ؟
تصفيق حاد ف القاعه ياهوووه
حتي الأعمى كمان صاحووه
وأنتهت القمة العربية
وهنعمل حفلة الصبحية
لاجل ميعاد القمة الجاية
ويكون برضة سؤال القمة
يلا عشان هنشد الهمه
شيكا عالعالي ........ شيكا عالواطي
ليه الشعب العربي مطاطي ؟

الشاعر علاء أبوذكري

حكاية عربي فلسطيني
------------------------
أنــــا عربي فلسطيني
بدافـــع عن أبي وأمي
وعن خالي وعن عمي
...............................
زمــان بلفور غدر بينا
وأمريكــــا كمان كانت
نواه للشــــــر والحسرة
وصهيوني كمـان سادي
يرش الدم ف بــــلادي
يصير أشجـــــار بتتكلم
تقول التـــــــــار وتتألم
وأنا من حبي لــــبلادي
بقول نفديكي بدمــــــانا
بدام الحق ويانــــــــــــا
....................................
ضربوني وهــــــانوني
شـربت المر ف بلادي
لو أتكلم يــــــــزيدوني
وأخواني العرب كــــانوا
على حالي يواســـــــوني
...................................
كتر الكلام تاه الســــلام
وأنا في بـــلادي متغرب
أبات رافع إيديــا لفـــوق
وقــــــــول ياحق م تقرب
أقوم أحلـــــم أنام أحلـــــم
بجنة خضــــرة ف بلادي
على شمـــالها كمان وادي
..........................................
أفوق م الحلم برصــاصة
تصيب داري تصيب قلبي
يسيل الدم من جســــــمي
أسد الجرح بأيــــــــــــديا
ألم ولادي حـــــــــــــوالي
..........................................
أقول الأرض يــــــاولادي
وحلم الجنة والــــــــــوادي
بأذن الله وبأيديـــــــــــــكم
تكون الأرض دي حــــرة
.........................................
أنا عــــــــــربي فلسطيني
بدافع عن تراب بـــــــلدي
بدافع عن ميراث ولــــدي
أنــــا عــــــربي فلسطيني
بمـــوت برصاصة غدارة
برش الغـــــــــدر بحجارة
....................................
بقول بـــــلدي وأنا فرحان
على ترابــــــــها أنا مولود
على ترابها يخدني الموت
وأنا في القبر هتكــــــــــــلم
ها قول بدمــــــــايا أفديكي
ها قول بترابــــــــي أبنيكي
أنا عربـــــــــــــــــــــــــــي فلسطيني
-------------------------------------

للشاعر / علاء أبوذكري

صوت الشهيد

==============

وسط الميدان وسمعت صوتك ياشهيد
أوقات بتضحك ضحكتك ذي السكات
أوقات بتبكي دمعتك توب الممات
ذي الكفن بتداري أسرار الحياه
ليه صرختك طلعت لفوق؟
يمكن عشان الناس تفوق

الكل خايف م الكلام رغم الكلام
الكل شايف سكتة وسط الضلام
الكل أصبح أرض بور
الكل مش محتاج لنور
طب لما يّجِي النور
ويفضح ظلمته
!الديب يعيش
خلاص مفيش
غير صوتك أنت ف سكتي
تضحك ساعات
تبكي ساعات
بس البكى هو اللى زاد

ليسَاني فاكر كلمتك
جوا الميدان
لما رسمت بخطوتك
لمبه وسور
الثورة ممكن تبقى ضلمة
وتبقي نور

وسط الميدان وسمعت صوتك ياشهيد
إنداه وعيد .............
يمكن حكاوي المسجونين جوا البيوت
يمكن أهات الموجوعين بره الحدود
توصلهم ..............
مين قالهم إن إحنا بنحب الكلام
ولا السياسه في عُرفٌهم
خلص الكلام . مفضلش غير دمعة شهيد
هي اللي يمكن تنتصر وتشدنا لبر الأمان
دم الشهيد زلزال عنيد
جوا القلوب الميتة
ليـــــــــــه كل ده
أحزاب كتير وكلام كتير
لو غيروا لنا ميت وزير
لسه الفقير نايم بيحلم بالغطا
لسه القلوب مليانة بتلال الصدا
لِسًاني بحلم بالأمان رغم اللي كان
لِسًاني حاسب خطوتي
بنداه ولو الصوت بعيد
وأن ضل صوتي سكتة
هيوصله صوت الشهيد
وسط الميدان وسمعت صوتك يا شهيد

علاء أبوذكري

أشكرك شاعرنا الكبير محمد فتحي مشاركتي بينكم شرف لي أدام الله المحبة والترابط بين أبناء الرابطة
وندعو الله ان تستمر فير إزدهارها أكثر فأكثر