قصيدة ( ايامنا )

قصيدة ....ايامنا
----------

يا زمان عشناه بطوله

والعرض ما شوفناهوش

ادى مرتب موظف

معدود قال بالقروش

مش جايب لقمة ناشفة

تصبح ع الكروش

افواه مفتوحة لكن

مرسوم فوق الوشوش

حلم الجعان فتايت

هيصحى ما يلقاهوش

شرط العروسة دش

وان خوفت ما جبتهوش

مرفوض قال بالتلاتة

للعذر ما يسمعوش

دا انا مرة قابلنى واحد

وياريتنى ما شوفتهوش

متحنجل بالموبايل

والرنة ما سايبهوش

وقريت منه البطاقة

من اسمه ما تعرفوش

الاسم بالتلاتة

جعان . حفيان . بشوش

المهنة فى البطاقة

عاطل عليه ما لوش

الحالة الانسانية

مخلوع من ناس ما جوش

عنوانه فى البطاقة

حارة حلق وحوش

ايام مقلوبة فوقنا

وبتضحك للقروش

واكلينها شالعة والعة

ويعبوا فى الكروش

صدقنى يا صاحبى اوعى

تنسى اللى ما قولناهوش

مش كل كلام هقوله

وان قولته ما تسمعوش

قصر الكلام يا صاحبى

ادعى ربك يحوش

-------------

---

» قصيدة ( ايامنا )
» قصيدة : شقى جدار الزمن ( قصيدة فائزة بالمركز الثالث في مسابقة الشاعر على الصافى الكويتية عام 2001
» قصيدة فى حب مصر
» قصيدة (انا مين )
» قصيدة متزعليش