حلمت بمصرنا جنة
.
كتير بحلم وأنا صاحي ومش خايف لأحلامي متتحققش
.
ومش خايف ليوم اليأس يهزمني
.
هتسألني
وليه متخفش؟!!
.
عشان إيماني جوايا مالوش آخر
.
وإصراري لا له نهاية ولا له سقف
.
حلمت في يوم أكون وأكون
وبرضه هكون
.
مدام قلبي ماهوش خايف
وعقلي رزين ماهوش طايش
.
أنا هبدأ طريق حلمي
وراح أكمل
ولا هيأسش
.
كتير بحلم وأنا صاحي ومش خايف لأحلامي متتحققش
.
في يوم النوم غلب عيني في عز الشمس
.
حلمت حلم أحلامنا
حلمت ب"مصرنا جنة"
.
شباب شغالة
مفيش عاطل ولا أيادي تقول لله
.
مفيش دبابير علي الأكتاف بتتأمر
وتتحكم في خلق الله
.
مفيش ع الوش ضحكاية وراها الإكتئاب والآه
.
حلمت بمصرنا جنة
ماليها الخير
مفيش طوابير
ولامية تجيب أمراض
.
مفيش تلميذ علي أستاذه يتمرد ولا إنسان يضيع حقه بلا أسباب
.
مفيش فلاح تبور أرضه اللي عايزة سماد
.
حلمت بمصرنا حرة مفيش عملاء مفيش خاينين
.
حلمت بمصرنا جنة صحاريها بقت بساتين
.
حلمت بإننا واحد صحيح مينفعشي يكون إتنين
.
حلمت بمصرنا جنة وفيها كلنا عايشين
.
وبعديها لقتني صحيت
.
ياريت الحلم كان طول ولو لحظات
.
ياريت يتعاد من الأول
ولا أقولك دا حلم وفات
.
أنا هحلم وأنا صاحي أشوف "مصرنا الجنة"
.
وكالعادة
كتير بحلم وأنا صاحي ومش خايف لأحلامي متتحققش
.
ومش خايف ليوم اليأس يهزمني
.
لسة مصر تسألني
وليه متخفش؟!!
.
بقلمي/ سعاد حسن رستم