زين وجميله !!!!!!!!!!!!1

أنا جاي أقول قصه

وموعظه للناس !!

قالوا زمان حكمه

أنا ماشي بيها أساس

قالوا فيه قلوب من طوب

وفيه قلوب من ماس

حكم القدر مكتوب

والمولي وضعه أساس

واللي يريد النجاه

يسمع لدي الحكمه …

أمشي عدل يابني

يحتار معاك الناس

*****************

الأسم كان زين ** وعوده كان أخضر

عريس يادوب شهرين ** وبيمشي يتمخطر

شاف الجميله جميله ** من ضحكها السكر

عيونها سودا وكحيله ** سبحانه من صور

بدأت معاه الكلام ** ياسلام ده متقدر

*************

ضحكت عليه البنيه** قالت له قلبي معاك

لو حتي هانروح فين** يازين أنا وياك

هنكون سوي حبيبين** يازين أنا بهواك

هندوب ف غمضة عين ** عمري ابتدي بالقاك

**************

رمت عليه الشبك ** وكلامها كان حاضر

من يومها زين انشبك ** وقالها حاضر

هانكون سوي عشاق ** من وقتنا الحاضر

حبك ده احلي غرام ** علشانه راح اخاطر

هجر الجدع دنياه

والبنت كانت معاه

فرحانه بوجوده

مشتاقه يوم تلقاه

وف يوم غلبها هواه ** ومعاه راحت شقه

قالها ريدك ف حضني ** ولم تقول لأه

سك البيبان كلها ** لكن نسي واحد

باب السما المفتوح ** والرب فيه واحد

شربت معاه الحرام ** ياناس ف كاس واحد

كاس أوله شهد ** وأخره فضيحه لها

جميله من مكرها ** ورت لزين دمعها

بكت ولمت هدومها** هاتقول أيه لأهلها

لملم دموعها الجدع ** طمن كمان قلبها

هايروح ويخطبها** واليوم يكون عندها

قالت جميله يازين ** أوعاك تبيع حبك

دانا جميله حبيبتك ** أنا كنت با واعدك

بحق أيام بيننا ** نفذ يازين واعدك

مسح دموعها وقال ** في الشرع ليه أربعه

هاتجوزك ف الحال ** لمي دموعك بقي

***************

أبوه سمع بالخبر ** م الصدمه عقله أتشل

وأخوه صرخ مجنون ** ياناس أخويا أختل

وامه لطمت خدودها ** وبس أيه الحل

اللي أتربط بالورق ** ازاي ياناس يتحل

كتب المغفل ورق ** أنه مدين بفلوس

وابو جميله حلف ** أني عليه راح أدوس

اللي ظلم ينظلم** ويدوق ياناس الذل

المولي عليم وحكيم ** أسمه ياخلق العدل

*************

أما مرات الزين ** قالت أكيد نزوه

أكيد ف غمضة عين ** راح تترمي بره

لو قلت مليون أه ** طب مين هيسمعني

أو قلت مش عايزاه ** مين بيته هايسعني

دا انا ياخلق وحيده ** وقليلة العزوه

قالت يازين سامحك ** قلبي .. وسامحتك

ضحك عليها بكلام ** ماهي ؟أصلها هبله !!

وأبوه من الصدمه ** ساب الحياه ف سكات

وقع ما قال كلمه ** ماهو أبنه قلبه مات

والكل تاه فكره ** بقي الجميع ف شتات

والأخ قال لأخوه

فرقت لمتنا!!!!

وبعملتك وياها

ضيعت فرحتنا

مرضت ياخويا أمك

وابوك ياخويا مات

وحلفنا بجميله

ماتخشش ف يوم بيتنا

زين ركب راسه ** وشيطانه غاويها

باع أهله واحبابه ** واتحدي الجميع بيها

ضيع أبوه واخواته ** علشان يراضيها

اتجوزوا بفرح ** فرحان يازين بيها !!!!

وكل أهل البلد ** عرفوا بعملتهم

وحكاية الاثنين ** قصه بنحكيها

مهما تدور الايام ** فاكرينها بماضيها

***********************

جميله من حظها ** جابت لزين الغلام

فرح الزين وقتها ** وقال مراتي تمام

هادوب انا ف حبها** ونعيش ولا الأحلام

عدت سنين وسنين ** وزين ياناس فرحان

بعد الولد جاب ولد ** وبنت حلوه كمان

نسي أبوه وامه ** نسي حكاية زمان

وكلام قالوه الاجداد ** من سالف الازمان

ياصاحبي عملك قاعدلك ** وكما تدين هاتدان

***************

البنت كانت جميله ** زي أمها ياسلام

وابوها بيحبها ** كتب اسمها احلام

احلام ..وكان حلمها**كلية الأعلام

وهناك لقت حبها ** في الجامعه شاب تمام

كسب الجدع قلبها ** ووهبها أحلي غرام

قالها أحنا تلامذه

والحياه عاوزه

فلوس وشقه كمان

ماقدرشي اروح لابوكي

ومين يكون صفي

انا لسه هابدأ حياتي

طب مين هاينصفني

لو كنتي بتحبيني

راح نرتبط عرفي

ويشهدوا الزمايل

وتكوني ف الحياه زوجتي

********************

أبوها عرف الخبر

لما بقت حامل !!!!!!

ولكل وقت أدان

ولكل موضوع أخر

زين صرخ بالأه

وقال ياخلق الله

دا اللي انزرع باحصده

والماضي كيف انساه

ماشي بجرح وأه

تايه ومالي أساس

واللي يريد النجاه

يسمع لدي الحكمه

أمشي عدل يابني

يحتار معاك الناس !!

الشاعر / فارس القرشي