فرصة غالية - محمد سعد دويدار

اللي فاض من دمعي عادي
واللي باقي ف صبري حبَّه
يلِّي هجرك جه كسرني
خلَّى ضيقتي مستحبه
عمري عشتُه ليك وعارف
إيه بيرضي ويطفي نارك
قولي بُعدك ده حقيقي ؟
ولا بتزود هزارك ؟
...
فرصة غالية ليك وممكن
فجأة تبعد عن إيديك
فرصة ليك ممكن في ثانية
توهب الفرح لعينيك
جوّا مني حنيني ثاير
والبشاير ف انتظارك
لسه باقي عليك وقلبك
قاسي ظالم باختيارك
.....
مية محاولة معاك وشكرًا
مش هيرخص دمعي تاني
بالسلامة عادي جدّا
هنسى حُبَّك والأماني
يلِّي غبت وسِبت ناري
تحرق الشوق والحنين
بكره تمشي وحيد وتبقى
بَعدي سيد المجروحين
#محمد_دويدار
#محمد_سعد_دويدار