خسرتني لمحمد سعد دويدار

دلوقتي بس أقدر أقول... قلبي انكوى
صاحبي إلِّي عشت العمر ليه ... باع ما اشترى
قتلني فجأة بسهم جرحه وسابني بنذف
يعني كل العشرة هانت وكل حاجة كانت هوا
عشرة سنين فرح وآنين
والمر قبل الحلو كُنا بنقسمه
لو مين يمل مش مستحل
لازم طريقنا نكمله
مهما ضاقت كنا نضحك
كنا نمسح أي حزن
كل كلمه لحد فينا
وقت حزنه بتبقى حضن
كنا نجري وكنا نلعب
كنا حاسين بالأمان
يشهد الشارع علينا
تشهد الجدران كمان
لما نلعب كورة مرة
حد يخرج م الجيران
نجري منهم نستخبي
صوتنا يعلى ويشوفونا
واما يمشوا نقول هنعلب
عمرهم ما يفرقونا
كنا لسه عيال بريئة
بس قلوبنا كانت جريئة
لما حد يكون ف عركه
كنا واحد وقت ضيقه
ولّا ليله العيد بنسهر
فوق سطوحنا مع الصحاب
كل عيد لازم نتمّم
مين معانا ومين غياب
كنا دايما ضهر بعض
كنا نغلب أي بُعد
كنا نسهر بالليالي
بينا يجي ألف وعد
وعد تبقى قلوبنا صافية
وعد ما يفرقنا حد
وعد يبقى هزارنا عادي
ونبقى وقت الجد جد
وعد طول اليوم نطمن
بعضنا أيه النظام
وعد منخليش مابينا
أي خدعه ف الكلام
كان ما بينا وعود كتيره
قول يا صاحبي أيه جرالك
كُنت شايفك ليه أخويا
كُنت لي بيشغلني حالك
كنت أقرب حد ليا
وكنت حطك ليه في بالي
ليه باشوف عينك حزينة
كنت احس بشيء أذاني
وقت غيبتك كنت صاينك
كنت بمدح يامه فيك
مش بشككر نفسي يعني
بس كل الشكر ليك
ألف شكر على الأذية
ألف شكر على الوجع
كنت فاكرك لسه باقي
كنت فاكرك ليه جداع
كنت أقول دايما ياطيب
وانت باعد فيه خطر
واما هونت عليك ساعتها
عرفت قلبك من حجر
يعني عادي تفوت حبايبك
أيه هيجرا وأيه يصير
ليه تضيع كل حاجة
ليه تبيع حتي الضمير
دلوقتي بس أقدر أقول
بالسهل عادي هتفتري
انت بعت وبالرخيص
ومش هتعرف تشتري
مش مهم انك أناني
مش مهم كسرتني
الحقيقة يا صحبي انك
بالسلامة خسرتني

#خسرتني
كلمات: محمد سعد دويدار
#محمد_دويدار

» متر في متر لمحمد سعد دويدار
» ضحكة يتيمة لمحمد سعد دويدار
» رباعية رقم 2 لمحمد رمضان شفيق
» رباعيه دائما لمحمد رمضان
» (( انتي ام الدنيا مصر )) لمحمد رمضان ..