قصيدة المحكمة للشاعر محمد عبد العزيز عطا

المحكمة
**************
المحاكم فيها ياناس متاهات
قصص كتير فيها العبر
فيها كمان حكايات
فيها قلوب متدمرّه
م الظلم باكية مفكرة
وفيها قلوب متحجّرة
أدى أب رجله مكسّرة
بيشتكى ظلم الولد
ابو سيجارة مخدّره
ضارب ابوه لجل الفلوس
والنفس تايهة مكدرّه
الاب ربّى سنين طويلة
والولد كان سكّرة
وفى العجز قام ساب ابوه
عايش حياه مدهوره
قرشين معاش بيستروه
و اوضته تبقى منوره
لكن الولد عايز حشيش
عايز حبوب مُخدّرة
اخد الفلوس
من غير حنان ضرب العجوز
وجاى ورجله مكسّره
صرخ ياناس فى المحكمة
ابنى الوحيد
ربيته شلته ع الكتاف
من كام سنة مالبست
حتى توب جديد
علــشان اربى فى الوليد
لافوا عليه حبة شباب
قالوا له يلا نشيل حديد
بس الحديد طلع ياناس
مخدرات
صاع الولد مبقاش فى بيته
كمان يبات
وأمّه تبكى من سكات
قالت ياعينى ضنايا راح
شلته ف حشايا
سهرت بيه انا ليل طويل
حتى الصباح
بس النهارده منى راح
احكم ياقاضى بحكمتك
يمكن ترجّع حكمتك
ليّا اللى راح
ومعاك براح.
..............................
وأدى زوجة باكية م الألم
محتاجه وعايشه ف مرار
شايلةالهموم
عايشة ذل و انكسار
ياحضرة القاضى
منين اشترى
اكل الصغار؟
سابنى أبوهم
وبقسوة طردنى
وفلوسه رايحه فى القمار
وانا وحدانية
لا ليّا اهل ولا ليّا دار
والعيشه بقت قهر ودمار
احكم ياقاضى المحكمة
ماتت قلوب البشر
والظلم بينهم انتشر
والجار بيجور ع الجار
.......................
وأدى أخ جاى المحكمة
شاكى اخوه
اللى ضاربه وطلّعو
من بيت إبوه
احكم ياقاضى المحكمة
بعد كلامك مفيش
كلام إحنا نقولوه
الحق فين
لما الصغار يضيّعوه
زاد الطمع بين البشر
والاخ يسرق حق اخوه
احكم ياقاضى المحكمة
واللى تقوله حنفذوه
******************
@محمد عطا@
14/10/2014
‏