عبد الحليم الزلوعى . زفة المولد

زفة المولد
دا أخـر يــوم في المولـد
نصلـى الضهر في الجامع
وبعد الصلاه والكل سامع
وسيدنا الشيخ يقـول تانـى
وصوته م الخشـوع دامـع
دى اخر ليله للمولد يا احبابي
وبعد العصر بمشيئته فيه زفـه
ما تيجـى معانا يا بـــردان
بــذكـر الله هــاتـدفــى
ما تيجـى معانا يا زهقــان
تســرى النفــس فـي الزفـه
وقـول لصاحبــك الغفـــلان
هايحصـل ايه لو يرجـع ؟
عن الغفلـه وياخــد لفه
ويبقى معانا فى الزفـه
وشـوف شوقـه مع اللهفه
هاتبقى معانا في الزفـه
واحد تاني ما تعرفهـوش
ما تساْلهوش عن حالـه
وايه جـوه المقـام جالـه
عشان البـركه في اللمه
وريحة المسك اهى هله
ويا سيدنا الحسيــن طلـه
العصر والميدان مليـان
م التجار والصناع والاعيان
من البنـدر وم الاريــاف
وثوب التقوى يبقى لحاف
وتبداْ زفــة المولد ببهجتهـا
ببركتها ببيارقها واعلامهـا
وراياتهـــــا اللى بتهفهــف
ترد الـــروح ولو مجــروح
ما تلقـــى الجرح في مكانه
وسكـان المقام حاضريـن
وياما كتير من الصالحـين
كانوا نايمين هنا امبـارح
وفي الزفه يكونوا صاحيين
عيونهم زي طير جارح
واشى بصجاتـه صحانا
واشى بالتــوره اه يانــا
ودا با الرق بيشخلـل
ودا با الطبله بيزغلـل
وده بيلـف علـى رجلـه
تشوفه تقول ولا الدبـور
طابور خارم خدوده خرمين
توصلهـم كــده مسلـه
ما هو مش جى يتسلـى
دي عاده عليـه يوفيهـا
يسـن مسلته فيهـا
وبنشوفهـا من الخديــن
شايله ليمـونه تحليهـا
لا نقطة دم بنشوفهـا
ولا واحد فينا بيفهـم
مسـله حديد ومسنونه
ومجنونه تخـش ازاى ؟
في قلـب الجلد ما تندع
كاْن الدم يحرسها ويحميها
واصحابها بيتمايلوا مع الزفه
مع البــركه مـاهم فيهـا
ومش واحد ولا هم اتنين
دا دول طابورين صلاة الـزين
ومنظـرهم يسـر العيــن
بيتمايلــــــوا على الصفيـن
وبينـادوا علي السامعيـن
انظرنا يا سيدنـا الحسين
ودول ماسكين سيوف بيضـا
وحد السيـف لامع فيهـا
يزغلـل عــين مريديهـا
وجوه الطبـل والزيطه
بيتمايلــوا بذكـر الله
وراهـم زفــة المعـمار
فريــق مزمـار قدامهم
وهــم وراه با القصعـه
وفيها الرمـل يوزنهـا
قوالب طـوب بتحليـها
ومنشـــاله بســقالـه
وكارو كبيـره مجـروره
بجوز م الخيــل ومسروره
وفوقها كور مع سنـدان
ويتمايلـــوا مع الاذكـار
واحشنـا طلتك يا حسين
وتيجـى زفة الاريــاف
بجلالبهـم وطواقيهـم
ودا شايــل بصل اخضر
ودا فاسـه على راسـه
ودا ساحب وراه خروفيـن
ودي عربية المحصــول
شوال العدس جنب الفـول
وصوتهم كلهــم واحــــــد
لســـــان بيوحد الواحـــــد
ودي عربيـة الصنعـه
في وسط الزفه مش ضايعـه
عليها دولاب دولف وابـواب
كراسى خرزان وتخطـروان
ودا استورجــى وبيلمــع
ودا معلم بيتقمـع وبيصنع
وبيجمـع دولاب مفتـوح
وسيدنا الامام فوق الحصان
نور الايمان باين عليه
النور بيجرى ف المكان
حتى الحصان الله عليـه
وناس على اجناب الطريـق
الخـل واقف والرفيـق
والكل داخل ع الميـدان
يلقى الادان هالل عليه
ينادى كل الصالحيـن
حـى على الصلاه
حـى علي الفـــــــلاح
بعد الصلاه قام الامـام
وبعوده نتقابل هنـا
بعوده يا سيدنا الحسين
وكل عام وانتوا طيبين

» عبد الحليم الزلوعى . هش
» عبد الحليم الزلوعى . مدد مدد
» عبد الحليم الزلوعى . السبوع
» عبد الحليم الزلوعى . حلم ليلة صيف
» عبد الحليم الزلوعى .مش عاوزها