عبد الحليم الزلوعى . حلم ليلة صيف

حلم ليلة صيف
دى ليلة صيف
ما سمعت اسم نسمايه ؟
ضبابها كثيف
ما شافت حتى نجمايه ؟
وهى البدر فى تمامه
ما فيها حتى قمرايه
كان الكون بقى مرايا
ومدهونه بلون ابيض
وناس تمشى بتتخبط
عرقها كانه متحنط
على الجته يلزقها
ويتبعزق على هدومهم
يبللها يلزقها
وتبقى والبدن واحد
وفى الفجريه قولت اجرى
على سطوحى اشوف نومه
لقيت نفسى فى غمضة عين
داخل فى حكايه وروايه
راح احكيها على السامعين
وهمه يقولوا براحتهم
دى كانت حلم ولا كابوس ؟
بداية القول لاقيتنى باقول
سلامتك والله يا غاليه
من الاهه وم التوهان
واحساس مر بالغربه
ما بين اهلك وم الهزيان
يا ورده فتحت ليا
ولفيتها بغصن ريحان
وسميتها وباسم الله ورقيتها
وفى سبوعها وفيت بندور
وكنت بايدى البسها
عروسه بنت ست شهور
وكبرت والزمن يجرى
وانا ما ادرى اللى متخبى
وباندهلك ما بتردى
وموجه تاخدنى وتودى
واسمع اه تناديكى
وباديكى فتحتى الباب
واشوف الناس تقول مالها
يا حسرة قلبى وجمالها
بيبعد عنها ويفارق ما بيودع
واخاف لايكون ما هايرجع
وتبدا رحلتى بيها على العيادات
عياده نروح ورا عياده
وتبقى عاده معتاده
علينا نلف ع العيادات
ودا يكشف وده يوصف
ولا نافع ولا شافع
كشوفهم والعشر وصفات

» عبد الحليم الزلوعى . هش
» عبد الحليم الزلوعى . مدد مدد
» عبد الحليم الزلوعى . زفة المولد
» عبد الحليم الزلوعى . ست الحسن
» عبد الحليم الزلوعى . سيف جلاد