الشاعر محمد نعمان الهوى

محمد نعمان الهوي
----------------
كان نفسى اساجل معاكم
دة الواو عشقى وغرامى
دة القلب داب ف هواكــــم
وبغيركم خسارتى وغرامى
..............
الواو دة بحر وكبير
لابد تعرف تعومة
ورمضان لو مش كبير
ما راح تقدر تصومة
.............
فلسطين اغلى من الماس
عاوزة الابطال والعزيمة
اما الخرفان وحماس
ما وراهم غير الهزيمة
...........
الواو من غير أكشن
لا طعم ليها ولزوم
وبلاش نقولها احسن
لو غاب عنا ولو يوم
.........
منورين يا حبايب
مجدى وعرابى وعطا
ربنا يخليكو للرابطة
ويجعلكم ستر وغطا
.........
اسمه عرابى ومعروف
بالاسم اصل الزعامة
لة طبع نادر وحروف
وفى الشعر دايما دعامة
...........
انت استاذ وشاعر
يا عاطف يابن سليمان
كلامك بيهز المشاعر
اسقينا منة كمان
..........
السيد الجهنى وصل
كلة سكوت واسمعوا
الخير بقدومة حصل
واكيد راح تستمتعوا
..........
آة من العيون السودوالرمش الاسمرانى
تعبت قوى ياناس و حبيبتى مغلبانى
شفتوا السكر بيدوب ازاى جوة الكوباية
اهى هى معايا كدة فى هواها مدوبانى
....................
منورين يا حبايب
والسهرة معكم جميلة
والحاضر يعلم الغايب
بحبكم يا احلى عيلة
..............
نبدأ بالصلاة ع الزين
احمد رسول الهداية
قولولى اكشن راح فين
واية حكايتة معاية
..........
محلاها سهرة يعينى
عاوزة رقية وبخور
مع مجدى والجهينى
هنسهر حتى السحور
..........
يا جهينى مقامك كبير
وعارفينك فوق العلالى
قول شعر واحكى كتير
يا اصيل وع الكل غالى
.............
الرابطة بيتنا الكبير
ربنا يجعلوا عامر
فية الجهينى الكبير
ومجدى فرج ابوعامر
..........
صحيت م النوم مبسوط
حلمت بفرحة جديدة
لقيت الحلم مظبوط
وقريت خبر الجريدة
ربى يصونك يا أكشن
ويجعل حياتك سعيدة
...........
الواو كلة احساس
بنقولةمن غيرمانتعب
اهداف توزن الراس
زى تريكة ومتعب
............
معانا مانتيش غريبة
يا اختنا المغربية
اهلا وسهلا ومرحب
نورتى السهرة دية
.............
احنا اخواتك يا غالية
والاخت دايما مصونة
ومقامك فوق عالية
زى ما اهلنا علمونا
..........
دى مساجلة تاريخية
وخلى العالم تشوف
الناس تساجل بمية
واحنا هنوصل الووف
..........
هيجيبوا فراخ ولحمة
يا ناس على البطاقة
ويمكن بكرة يجيبولنا
ظرافة وفيل وناقة
...........
قول يا جهنى قول
واسقيينا من نيلك
كلامك زين ومعقول
يا تجينى يا اجيلك
.........
روح صلى الفجر واركع
وادعــــــــــــيلنا يا هرم
نصلى الفجر جـــــــمعا
انا وانت ..فى الحرم
...........
منورين يا حبايب
وين ما تكونوا قاعدين
استاذنا مجدى وامينة
والجهنى وعزالدين
..........
واوعا تقول نسيتك
انت الحبيب الغالى
يا محمد يا ابن الامير
دايما انت على بالى
...........
ياجهينى كلامك سكر
بالمعنى الزين زاخر
والسهرة معاك مشهودة
دى فى العشر الأواخر
...........
يا ست الكل يا امينة
ضيااكى منور الدنيا
دة مهما رحنا او جينا
كلامك انتى حاجة تانية
..........
رابطتنا زى عروسة
فى صورة اتصورت
وبحضور الاستاذ مجدى
كل الدنيا نورت
..........
عمرى عنك ما هغيب
يا مجدى يا سيد الكل
دة انت اعز حبيب
ونهارك ورد وفل
.............
ياحبايبنا بتوع رابطتنا
مستنيكم بقالى زمان
عاوزين نكمل مساجلتنا
فوق الالف كمان وكمان
...........
مهماالزمان ويدور
الواو. هيا .هيا
زى ناعسة وبدور
وزى ياسين وبهية
..........
مساجلة حلوة وجميلة
كانت ناقصة حاجة
واتلم شمل العيلة
بحضوركم يا سادة
.........
دى مساجلة ولا قصة
من .الف ليلة وليلة
واكتملت الف حصة
تشفى الروح العليلة
..........
متابعكم بسكات
اليمنى وياة مجدى
دول فرسان الواوات
وانالااجيب ولا اودى
..........
مش لاقى كلام اقولة
اول مرة فى حياتى
علشان الجهنى غايب
دة حبيبى وبلدياتى
...........
ياريت يشرفونا
ست امينة وامير
حبايبنا بيوحشونا
غايبين عنا كتير
..........
دنيا مرسومة بقلم
والارزاق بتتقسم
ارمى حمول الالم
ع الارض واتبسم
..........
الحب دة احساس
فية راحة ومنةعذاب
صدق اللى قال يا ناس
ان الهوي غلاب
..........
امانة يا طبيب قلبى
كما الطير المدبوح
ولو قريت اسم حبيبى
جوة القلب اوعا تبوح
..........
خليكى دايما يا امينة
قلبك كبير ومسامح
ورمضان كريم يالغالية
والمؤمن فية بيسامح
.........
اعلام فاسد عارفينو
بقالنا زماااااااااااااان
بياكلوا كروسان وفينو
والشعب جعااااااااااان
..........
يوماتى نسمع مصايب
ولا فية اخبار تسر
وسهم الموت ما صايب
غير جواهر ودر
..........
لو بدلوا البخل بالجود
للخلق شافوا العجايب
دة الطفل لسة مولود
ولرزقة معاة جايب
..........

لو بدلوا البخل بالجود
للخلق شافوا العجايب
دة الطفل لسة مولود
ورزقة معاة جايب

يوماتى نسمع مصايب
ولا فية اخبار تسر
وسهم الموت ما صايب
غير جواهر ودر

شكرا لك استاذنا الكبير الشاعر الحبيب / محمد فتحى على تفضلك بنشر اشعارى على موقع الرابطة بمحركات البحث العالمية وهذا شرف لنا وتحفيز للمزيد من الابداع ان شاء الله وكل عام وحضرتك والاخوة والاخوات جميعا بالرابطة الغراء بخير وصحة وسعادة ولكم خالص مودتى واعتزازى .........
..................
محمد نعمان الهوي
2014/7/23

» إهداء من الشاعر محمد نعمان الهوى
» رباعيات محمد نعمان الهوى
» السيرة الذاتية ( محمد نعمان الهوي)
» مربع إهداء من الشاعر محمد فتحى الى الشاعر عطية شواش
» إعدام قلب كلمات الشاعر محمد فتحى السيد قراءة تحليلية الشاعر خالد عز الدين