قصيدة (سايق عليكى النبى) للشاعر محمد عبد العزيز عطا

سايق عليكى النبى
**************
سايق عليكى النبى
ماتبعدى عنى
دا انتى منايا ومطلبى
وحبة الننى
القرب منك هنا
بعدك بيألمنى
ان غبتى عنى ف يوم
رنة تطمنى
.............................
سايق عليكى النبى
ماتقولى وتعيدى
كلمة بحبك عندى
دى نبض فى وريدى
وان قلبى شافك يوم
بيبقى يوم عيدى
................................
سايق عليكى النبى
تحّنى عليّ
انا قلبى بيحبك
والقسوة مش ليّ
وان كنت بعاتبك
دا من غلاوتك عندى
ياللى فى قلبك تقاوى
طيبة وحنيّة
..............................
سايق عليكى النبى
ماتغدرى بيه
ولاتقطعى ودنا
وتظلمى فيه
القسوه دى مش لنا
ولاحتى من طبعنا
دا انا قلبى مزروع
جناين ود وحنية
................................
سايق عليكى النبى
تقدرى حبى
اللى عايش لك من زمن
وانا كنت بخبى
بس الزمن بيمر
والعمر بيعدى
والشعر طقطق بياض
امانة ماتصدى
*******************
@@الشاعرمحمد عبد العزيزعطا@@