رباعيات أكشن * محمد فتحى السيد

رباعيات
>>> محمد فتحي السيد <<<

1
　كل العيون نامت وانا وحدى ليه سهران
بحلم ببكره سلام مع انى وسط نيران
والدم غرق لنا مصاحفنا والصلبان
اكفينا شر الفتن يارب يا رحمن

******************
2
مهما يعلوا السور ويبنوا بينا حيطان
ويكشفوا المستور ويزيدوا الاستيطان
بكره الأمل بالنور ياقدس يجمعنا
نتحدى أوجاعنا ونحطم القضبان
**************
3
ياما فيه كتير أفكار محبوسه فى الأدراج
والهم كان دمِّـل أصبح كده خًـرَّاج
بيرفعوا الهلفوت والمبدعين فى تابوت
وادى الحياء بيموت ومعدش فيه إحراج

*****************
4
ايدى ف ايدك ياجمعه نمسح الدموع
ونبنى طوبه طوبه ونعـمَّر الـربوع
نحقق اَمالـنا.... .... وتكبر عيالنا
فى صحه وعزه وكـرامه وسطوع
****************
5
لملم فى اشلائك واشبع بُكا ونواح
لادمع يمحى حُزن ولايرجع اللى راح
كفايانا صمت وشجب والرقص ف الأفراح
يا أُمَّه متفككه م تعيدوا مجد صلاح
************************
6
حامت على راسى طيره بلا طيار
صوتها بيزعجنى ويشتت الأفكار
لا عينى بتشوفها ولا رصدها ردار
فجأه لقيتنى بموت والدنيا صبحِّت نااااااااااااااار
****************
7
ناسك باعوكى حبيبتى بس انا شارى
بزرع فى حَبك وحُبك فى الحشا سارى
حزين عشانك وشانك فيكى فساد جارى
بيجنوا وردك وشهدك واجوع انا وجَارى

****************
8
اعوام كتير عايشين على الأوهام
والكون بيجرى وإحنا لسه نيـام
اللى بيسرق واللى بينافق الحُكَّام
كل ما نحلم بأفضل يقتلوا الأحلام

**************
9
　
ياقلبى حزنك خساره على اللى بالظلم راضى
ساكن قمقم فى حاره ولغيره الكون فاضى
يسد جوعه بلقمه ويروى عطشه بدموعه
لاتوب يكسيله عَوره ولا فَرشه ترحم ضلوعه
**************
10
بُكره فى علم الغيب والأمس صار ماضى
واليوم انا مرهون ايش يُحكم القاضى
خايف يكون مجنون ومن الإيمان فاضى
وافضل كده مسجون بالظلم مش راضى

11
*************
تعرفوا تقيسوا سعادتى لو تكون الفرحه سابقة ؟
قلمى ينزف من مدادى والحروف تلقاها سارقه
كل احاسيسى ومشاعرى كل تفكيرى العميق
فى الأدب اصبح غريق جوا أحضان المسابقه
*****************
12
الكل شارك هنا ونال وسام الشرف
اعضائنا والحُكَّام كله اكيد اتعرف
وحروفنا ع الأوتار لحن جميل اتعزف
ياصحبة من أزهار فى احلى فازة خزف
************
13
رحلت غيوم السما ونزعنا كل الخوف
اليأس تاه عننا صارت امالنا سيوف
ضد اللى خد مننا المليارات وألوف
رجعت بلدنا لنا صبح الفساد مخسوف
****************
14

قد اللى فات م الذل والقهر والسرقه
هاصرخ بصوت عالى واقولها وبحرقه
اصحوا ياناس م النوم دى المركبه غارقه
زيحوا ستار الليل الشمس اهى شارقه
***************
15

دور على الإبداع أكيد هنا تلقاه
معانا تلقا الهنا و بينا تنسا الاه
صحبة زهور كلنا فاحت عبير ( الله )
اللى معانا اتولد واللى فارقنا تااااااااه

*******************

16
نور الأمل طالع بيقول ياحريه
كل الفساد واقع يا أمه عربيه
ادى الشعوب ثارت والثوره سلميه
الأوله ف تونس والتانيه مصريه
***************
17
رحلت غيوم السما لما بدرك هل
كل الحبايب فرحوا أما العزول إنذل
ريحة الوجود فى لقاك ياسمين ومسك وفل
حضنك حنان وأمان قلبك يساع الكل
*************
18
لامونى الناس على التوهه فى سحر عينيك
وحسدونى على الفرحه فى لمس ايديك
على جنونى وانا هايم خلال معانيك
افكر فيك وانا صاحى وانام الاقيك
**************
19
هو الأمل راح فين ؟ ليه الطريق انسد ؟
الفرح عمره يومين والحزن مالوش حد
الدمع سال م العين جرح الجبين والخد
والشوك على الجانبين غارس فى قلب الورد
****************
20
ياأمّه يا مدرسه فيها الفصول بتبوش
اتهدّت الأسوار دخل الكلاب الحوش
خافوا الاساتذة من الضرب والبهدله
لما زميلهم وقع مابين صوابع بوش

21
رد السلام ده فرض يـاحلـو ليه تقلان ؟؟؟
الحب جابنى الأرض أصبحت فيك هيمان
انت الوحيد فى الأرض اللى احتواك قلبى
ياهل ترى ياملاك هاتحن ع الغلبان ؟؟؟
************
22
كتبت مشاعرى بمدادى وبالفرشه مع الألوان
وتوهت فى مجد اجدادى و عهد العزه والفرسان
اشق الصحرا والوادى وادورلى على عنوان
لقيت الغربه فى بلادى لقيت الذل بالألوان
**************
23
فتحت الجرح ع الاخر يا اعز حبيب
صبرت وقولت فى الاخر هايجى طبيب
لقيتنى فى رف مِتّـاخِر كما الدباديب
بنادى وصوتى ع الاخر ولافى مُجيب
************
24
بحب كل البشر من كل جنس ولون
لوكانوا أُدبا وشُعرا أهل ثقافه فنون
قلبى أكيد هايسعهم لوكانوا ملو الكون
وأعشق أكيد إبداعهم لوكان هبل وجنون
*****************
25
أنا ماشى على الهامش
لا أنا مفتّح ولا رامش
تايه فى السنين مطحون
وميت بس اهوه عايش
***************

26
يا ميت صلاة النبى ع الصحبه والأحباب
قلبى فرح والنبى بلقــاكوا بعد غياب
اوعوا تغيبوا تانى أصل غيابكوا عذاب
لو تدخلوا قلبى هقفل عليكوا الباب
************
27
هاكتب اللى جوايا بصدق وجد
واطلع اللى فى حشايا لأبعد مد
أضفّر م الحروف مدفع يقول الحق
ويهدم قلعة الظالم ويبنى المجد
***********
28
راضى بقليلى والصبريابا فاض منّى
والمسـؤلين من كل حلــو حارمنّى
ربوا الكروش واللحم كاسى ع الننى
مايهمهومش انهم سارقينّى ونهبنّى
*************
29
نامت قوالب كبيره وقامت اللى نصاص
وانا ماشى زى الساعه وعقربى رقاص
بعمل بكد وجهدى فى منتهى الإخلاص
وهو دافن فنى ولدمى ليه مصاص ؟؟؟
***********
30
ليه شكلى عامل كده قوليلى يامرايا
وشى كتاب مفتوح والجسم برايه
نظرات عيون الغرام سابت ف قلبى الم
وكل سن اتقصف ساب نقطه جوايا

31
يا ألف رحمه ونور ع اللى زاحوا الستار
شهدائنا فى التحرير على قايمة الثوار
هما اللى فتحوا الباب خلونا اهوه احرار
يارب اكتب لهم فى جنتك ابرار
***************
32
سرق الفساد عمرى وسوِّد الأيام
نيمنى فى قهرى صحانى ع الأوهام
قيدنى فى جحرى وعتِّم الإعلام
وبعد طول صبرى هاحقق الأحلام
***************
33
نام الفيران فى الجحور من صيحة الثائرين
أصبح جمال طرطور وعلاء ياناس مسكين
راح نكشف المستور وسوزان توفى الدين
صفوت نظيف وسرور والغالى بطرس فين ؟
****************
34
رب العباد يمهل لكن بدون إهمال
والعز لو يهبل مالوش لزوم المال
والكرسى لو طوَّل لابد يوم تنشال
والدنيا تتحول أصل دوامها مُحال
*************
35
ردوا الفلوس لينا يامرجعين الحقوق
الصبرفاض بينا عاوزين شوية ذوق
لجل المريض يشفا يصحا كده ويفوق
واللى اتوحل فى الفقر يطلع يقب لفوق
****************

36
دقت طبول الثوره بإيدين شباب أحرار
فتحوا بيبان النور وفتشوا فى الأسرار
قام اللى كان مقهور ماهمه ضرب النار
قرر يعيش راجل يايحَصّـل الأبـرار
*************
37
ظات الفساد لعقود خنق الغصون ع الشجر
الشعب يزرع بجود وهوَّ يجنى الثمر
يقول كلام ووعود هانصلح اللى انكسر
أمل الشباب مفقود من كُتر صبره انفجر
**************
38
بات الشريف مسجون باتوا اللصوص بره
بيغـرقـونا ديـون والعيشه كات مُـره
نشقا نلف الكــون ف الغربه يا حسره
ياسارقين بجنون نسيتوا ليه الأخره ؟
*****************
39
شرفتوا مصر بجد يا أجمل شباب الكون
الضعف بيكوا اشتد صحيتوا كام مليون
بيت الفساد اتهد عــ الحاكم المفتون
رسم الشهيد المجد والدم كان بيهون
***************
40
نادى الشهيد أُمى واحد وعشرين مارس
ماتحمليش همى ابنك بطل فارس
وماتمسحيش دمى انا بالفرح حاسس
يامصرنا هِمى وامحى الفساد خالص

41
اَه علِّى فاقد وطن اَه علِّى فاقد أُم
نَهاره حُزن وشَجن وليلُه حالُه يغُم
فقد مكان السكن فقد الحنان بِِـ الكَم
لايداوى جرحُه زمن ولا حُضن دافى يضُم
****************
42
صعب الشعوب تسمع لأى حاكم صوت
لو بالديوك يدفع يقتلُه كام كتكوت !!
لابد يوم يرجع يصغر كما البرغوت !!
صعب الفساد يقمع صعب الأراده تموت
*************
43
رفرفت روح الشهيد صحِّت قلوب خايفه
قالت لهم من جديد انا فى النعيم شايفه
رجال قلوبها حديد كانت لهم واقفه
واللى استخبوا بعيد أكيد دى ناس هايفه
****************
44
لالا يازمن الظلم لالا ياوكر اللصوص
احنا بسلاح العلم هنعدى فيكوا ندوس
اصحوا بقا م الحلم هاتوا الدهب والفلوس
السلطه صبحت وهم وحياتكوا صارت كابوس
****************
45

رفع سكوتنا ناس كانوا زمان واطيين
ملكوا الدهب والماس واحنا اتغرزنا ف طين
اللى اشتغل كناس واللى مع العاطلين
شربنا مُر الكاس ياظُلم أخرك فين ؟؟؟
***************

رباعيات
>>> محمد فتحي السيد <<<
46
رحلت طواغيت فسادها ومصر غيرت توبها
وكل شهيد من ولادها نور عينها محبوها
طهَّر بدمُّه ترابها وأمله تمحى عـيوبها
فـتَّح جميع أبوابها للى داستهم كعـوبها
ــــــــــــــــــــــــــــــــــــــــــــــــــــــــــ
47
ريح الغضب جامده وشديده بـ الـ لمه
كل الشباب صامده بيزيحوا فى الغُمه
روح الشهيد صاعده بتـنـوَّر العـتمه
كونى يانار بارده على مصر والأُمه
ــــــــــــــــــــــــــــــــــــــــــــــــــــــ
48
رن الجرس مُنذر لكل حاكم طاغى
مُتعالى مُتكبر لحقوننا مش ساعى
فى بلادنا بيدمر هُوَّ وشلة أفاعى
الشعب لن يغفر لو كنت يوم راعى
ـــــــــــــــــــــــــــــــــــــــــــــــــــــــــــــ

» من رباعيات . الشاعر محمد فتحى السيد
» الشاعر محمد فتحى السيد والشاعرة جيهان فتحى فى سجال عيون القمر . وآراء النقاد
» موال.محمد عبد الرازق زهيرى . قراءة محمد فتحى السيد
» أهداء من الشاعر محمد سعيد للشاعر محمد فتحى السيد
» رباعيات الشاعر محمد فتحى