وضاع الشعر والبسمة / محمود جمعة

وكنت الصبح متعود
أفتح عيني ع التليفون
اقولك
يا صباح الخير
وحشتيني
وأكتب شعر لعيونك
وأقول يارب تتبسم
ويعجبها بيتين الشعر

وكان الصبح بيحبك
وييجي ينام
علي شعرك
ما بين الرنة ع التليفون
وبين صوتك
ف لحظة ما بيدلل
ويتشاقي
ويحلف اني ماوحشتوش
ولا مر
الخيال عندك

وكان الصبح
بيغير موت
من الليل اللي بيضمك
ومن صوتك ف سيارتي
وهو بيحضن اللحن
اللي متخبي
ف صوت ثومة
(( ولما أشكي تخاصمني ... ))
ومن ضحكتنا
لما اللحن يتلخبط
وننسي كلام

وكان الصبح
بيقولي
أموت وأعرف
ليه العشاق تحب الليل
وتكرهني
وأيه السر ان الليل
بيرسم ع الحيطان صورة
لمحبوبتك
وهي بتلبس الفستان
وليه الليل
يلون نفسه رغم سواده
بالالوان
وانت كمان
بتتلون سعادة وشوق
وتبقي ماشي علي مهلك
وطاير فوق
اقوله أسكت ...
وليه بتغير ؟؟
ما خليك في صباح الخير
وبيت الشعر والبسمة
وسيب الليل
جريء مجنون
بيتغزل ف أحلي عيون
ويكتب فوق ضفايرها
كلام ممنوع
ويهمس للعيون شوقه
بصوت مسموع

ماعدتش الصبح يا حبي
ولا التليفون
ولا حتي بيتين الشعر
بقيت بصحي علي الحرمان
وأنا نايم تلاتة الفجر
الاقي موبايلي متنكد
والاقي الصبح بيأكد
بأنك في زمن تاني
بعيد عن صدري وحناني
لا بيهمك
صباح الخير
ولا حتي بيتين الشعر

» كش ملك / محمود جمعة
» أبن السفاح / الي كل من سرق شعرا / محمود جمعة
» النهضة مشروع الحياة / محمود جمعة
» جمعة وسبت وحد
» حياء البحر . د . عزة محمود على حسن