قصيدة حبيب تفصيل للشاعر حسن احمد

حبيبتى دى تجنن
عاوزة حبيب تفصيل
ما تحبش الجاهز
اصل دا دمه تقيل
يقلها بحبك
ووحشتنى يا جميل
عاوزاه حبيب بريموت
يموت فى حبها موت
تغلط ما يزعلشى
تبعد ما يندهشى
وتفوت منين ما تفوت
عاوزاه كمان انسان
شاعر كده فنان
يغنى ف عنيها
اعذب الالحان
على شرط دمه خفيف
ويكون وسيم ولطيف
وهى تخلفله
مواعيد وتحلفله
ما تجيش ف مواعيدها
يزعل يبوس ايدها
بقى هو كده الحب
انا بحسبه تخاريف
قلتلها اشوفلك
حبيب كده بلاستيك
على شرط مش صينى
ويابانى مش تايوان
يحب بمزاجك
ويعجب كده اصحابك
وتفرجيه لجيران
خلاص طفشت يا ناس
وزهقت م اللسعان