محمد فتحى فى مساجلة شعرية مع عزة الزرقانى

البداية للشاعرة عزة الزرقانى
..................................
نفسك تشوفنى

وتشوفنى ليه

ح تكون واحشنى

ح تقول لى أيه

بعد العمر ما عدى وراح

بعد ما قلبى نساك وارتاح

بعد خلاص ما طلع لى صباح

نفسك تشوفنى

نفسك تشوفنى علشان عارفنى

صعب أن أعيش

من غير عنيك

وتشوف ملامحى

تفرح بجرحى

تتشفى فيا

دمعى يداويك

وطيب جروحك

وتهنى روحك

لحظة ما بضعف

تضحك عنيك

نفسك تلاقى

شمعى اللى باقى

أطفى نوره دبل شعوره

علشان شاريك

أنا مش ح أقول لك

أن أنت كلك

مواحشتنيش

لكن بقول لك

من غير وجودك

بقدر أعيش

واحلم واغنى

وافرح لأنى

قدرت أبعد

ومهمنيش

نفسك تشوفنى

عزة الزرقانى
______________________
=================
رد الشاعر محمد فتحى
.............................
نفسى اشوفك

ايوه طبعاً نفسى اشوفك

والايدين تحضن كفوفك

والغى حزنك وامحى خوفك

وارسم الفرحه ف عينيكى

صعب افرح يوم بجرحك

مستحيل اتشفى فيكى

نفسى اقرب منك اكتر

نفسى اعيش العمر ليكى

نفسى ادوق الشهد واسكر

م الحنان اللى مليكى

نفسى اكونلك خط سيرك

نفسى اكون قدرك مصيرك

تبقى ستى وابقى سيدك

تكتبى اسمى ف كشوفك

تحضنى شعرى بحروفك

متغبيش عن عينى لحظه

لجل طول العمر اشوفك

ايوه طبعاً نفسى اشوفك

الشاعر / محمد فتحى السيد

==================
======================
رد الشاعرة عزة الزرقانى 2
.................................

كفايه عتاب وفرحنى

بلاها كلام يجرحنى

يفتح ف اللى عدى وفات

ويملى القلب تانى أهات

وتحكى حكاوى تدبحنى

تطلع نفسك الاستاذ

تجيب سرتك وبالألماظ

وتبنى لى ف حيطه أزاز

مهوش إنجاز ولا إعجاز

ولا يغير ضمير منحاز

يبدل حق بالباطل

وبيماطل

ويلعب دور ولد شاطر

وكل دا أيه وانا صابره

ولم جروحى بالأبره

وهدهد فيك ولا يهمك

م انا اللى دمى من دمك

وانا اللى قلبى شال همك

وخلاك فوق هرم عالى

ويحكوا عليك ولا أبالى

واقول ان انت فارسهم

منور ليل فوانيسهم

وادلل فيك متزعلشى

واشيل حزنك مابين رمشى

ودارى عليك

وتسهر عينى ماتنمشى

عشان تراعيك

واكبر فيك . تصغرنى

تهين أحساسى وتلومنى

واصبر تانى أكمنى

بقولها لروحى دا منى

وانا واثقه وفاهمه تمام

مهونش عليك

أمانه عليك ما تخزلنى

عزة الزرقانى
==================
======================
رد الشاعر محمد فتحى 2
...............................
عتـابنـا حبيـبتى مش ممنوع

عتـابنـا للـصـفاء عـنـوان

عتـاب الـحب شئ مشروع

بعيد ع الـذل والـخـزلان

وكيف اخزل شعاع عينى ؟

ونـور الشمس ف جبيـنى

ياساكنه أُذينى و بُطيـنى

ومالكه القلب والوجدان

انا افرح لو تـعاتـبيـنى

ولو زعلان تصالحيـنى

ولو مجروح تداويـنى

وتروينى يانبع حنـان

ولو غلطانه انا مسامحك

ولو زعلانه انا اصالحك

ولو تقلانه بملامحك

شوقك ف العيون بيبان

تسبلّـك رموش عينى

صدى نبضك ينادينى

و تـتـمنى تضميـنى

واحس بقلبك الولهان

اضمك ضمة الملهوف

وارجع دمك المخطوف

وشفايفى عليكى تطوف

يعود الحب تانى شباب

ساعتها نقول كفايه عتـاب

محمد فتحى السيد

روووووووووووووعة
ودي وتقديري

» أهداء من الشاعر محمد سعيد للشاعر محمد فتحى السيد
» لسه بتفرعن . محمد فتحى السيد
» على جسر القصيده . محمد فتحى السيد
» الشاعر محمد فتحى السيد والشاعرة جيهان فتحى فى سجال عيون القمر . وآراء النقاد
» موال.محمد عبد الرازق زهيرى . قراءة محمد فتحى السيد