من رباعيات . الشاعر محمد فتحى السيد

نزلت بين الحروف أبحث عن المعنى

عمال الف واطوف والشعر جمَّعنا

ديوان مايسوى بيت وبيت يساوى ديوان

الفاظ تنزِّل تحت والفاظ بترفعنا

عاتبتها ورميت همومى حجرها

وشكيت لها والشكوى تعبت قلبها

قالت لربى مسلمه كل الأمور

دعيت لها يارب احفظ شعبها

تبدأ طفولتك بالبراءه والتأمل والعجب

مايشغلك غير ثدى امك واللعب

تبلغ صباك تلقا الحياه حزن وفرح

ومن شبابك للمشيب تتمنا ترتاح م التعب

ليه شكلى عامل كده قوليلى يامرايا

وشى كتاب مفتوح والجسم برايه

نظرات عيون الغرام سابت ف قلبى الم

وكل سن اتقصف ساب نقطه جوايا

صبح الصباح والجراح انت اللى صحيتها

كام الف اه ياجدع فى القلب خبيتها

وقلت اضحك فى وسط الناس واضحكم

لميت جراحهم ياجدع وجوه القلب حطيتها

مهما يعلوا السور ويبنوا بينا حيطان

ويكشفوا المستور ويزيدوا الاستيطان

بكره الأمل بالنور ياقدس يجمعنا

نتحدى أوجاعنا ونحطم القضبان

ياما فيه كتير أفكار محبوسه فى الأدراج

والهم كان دمِّـل أصبح كده خًـرَّاج

بيرفعوا الهلفوت والمبدعين فى تابوت

وادى الحياء بيموت ومعدش فيه إحراج

طلق ووجع وبصرخه يخرج للحياه

بنت وولد بيشدوا كل الإنتباه

شمس وقمر غار الجمال من سحرهم

لكنهم كان عمرهم لحظات ويبلغ منتهاه

رد السلام ده فرض يـاحلـو ليه تقلان ؟؟؟

الحب جابنى الأرض أصبحت فيك هيمان

انت الوحيد فى الأرض اللى احتواك قلبى

ياهل ترى ياملاك هاتحن ع الغلبان ؟؟؟

هاكتب اللى جوايا بصدق وجد

واطلع اللى فى حشايا لأبعد مد

أضفّر م الحروف مدفع يقول الحق

ويهدم قلعة الظالم ويبنى المجد

انا ماشى على الهامش

لا انا مفتَّح ولا رامش

تايه فى السنين مطحون

وميت بس أهوه عايش

نامت قوالب كتيره قامت مكانها نصاص

وانا ماشى زى الساعه وعقربى رقاص

بتعب بجد وجهدى بيعود على غيرى

ياكل وينهب خيرى ولدمى ليه مصاص ؟؟؟

حنيت ترابك دمنا ما رضينا يوم تتباع
مين اللى قال لك ياوطن هانترك البياع
تهون ولادنا ياوطن ولا شبر منك يهون
ازاى نعيش ياوطن لو جزء منك ضاع ؟
-----------------------
محمد فتحى السيد

روووووووووووووعة
ودي وتقديري

» رباعيات أكشن * محمد فتحى السيد
» الشاعر محمد فتحى السيد والشاعرة جيهان فتحى فى سجال عيون القمر . وآراء النقاد
» الشاعر محمد فتحى السيد . رجعتلك
» إعدام قلب كلمات الشاعر محمد فتحى السيد قراءة تحليلية الشاعر خالد عز الدين
» أهداء من الشاعر محمد سعيد للشاعر محمد فتحى السيد