الشاعر عادل صابر‏ ( على جرح غزة )

عادل صابر‏
على جرح غزة
************
مفتتح:-

ياطفل مدفون بلِعبك
فى القبر حاضن حصانك
والجرح ياحيلة تعبك
وابوك دراعه ماصانك
***
ياشعب على أرضه مصلوب
تنزف ولا حد جارك
الأرض والعرض مسلوب
ايه باقى غير انفجارك
القصيدة
********
واحكم بالعدل ياقاضى
قدامك مجروحين
والجرح ياقاضى واعر
وبينزف من سنين
ماتت فينا الضماير
شايفين لكن ضراير
فى خواتنا الضرب داير
وودانّا من عجين!!
نايمين جوا الحواصل
مش داريين باللى حاصل
لا سمعنا بغزة واصل
ولا حتى دير ياسين
غزة الحرة الحنونة
دمها تحت الزتونة
ياما صرخت انجدونا
وقلوبنا سودا طين
طب كيف رح ننجدوكى
من إيد عمك واخوكى
من بعد ماكتفوكى
ورموكى ف زنازين
همك ياجريحة هَمى
دمك لوسال دا دمى
مظلومة يابت عمى
ياام القلب الحزين
واقفة لوحدك تشاشى
للراكب واللى ماشى
جرحك محتاج لشاشى
لكن جرحك جوين!!
ياقلوب خضرا وحزينة
تايهة على كل مينا
وجعك بيئن فينا
ولا حاسيين بالأنين
فماتعشميش فى جارك
عمره ماياخد بتارك
خليكى فى صحن دارك
ربك هو المعين
وماتتكليش عليا
بلدى قطعت ايديا
لا اقدر اشيل بندقية
ولا عارف السكة فين
متّاوى من المغارب
خايف زى الأنارب
لو قالوا قوم وحارب
حاارفض واشجب وادين
والحسبة ف مخى باينة
حااحرق علم الصهاينة
واشتم على امة خاينة
باعت قرآن ودين
وِن كان حدِش شايفنى
اسهر ماقفلشى جفنى
وابكى على صدر(ليفنى )
واقول آكلك منين
ون بصت ليا اخاف
واكمش تحت اللحاف
أصل احنا ناس ضعاف
مش قد الصهيونين
وادفس راسى ف طاقيتى
وادسَّى فى جلّابيتى
واخاف ل..تهد بيتى
دولا عالم مجرمين
خمرة ونسوان ومزّة
نسّونا جرح غزة
ياوطن غرقان فى نزّة
شوف اللى دبحنا مين
مالكيش غير بس ناسك
اللى بايدهم خلاصك
عيشى ياغزة بحماسك
حرة ورافعة الجبين
ولدِك ع الظلم صابر
ضاقت بيه المعابر
ياما قلنا على المنابر
ولا حدِّش قال آمين
كان نفسى ياغزة اجيلك
واجبْر كسرة صهيلك
واجلح فى النار واشيلك
منعِتنى القوانين
اصل انا فى الحرب زاهد
عمرى ماافكِّر اجاهد
من حقى انى اشاهد
وعنيا مغمّضين
***
وافتح على الجزيرة
وف قلبى نار وحيرة
والمح غزة الاسيرة
وايديها مكتّفين
والقى دمانا الغزيرة
تشبه بحر الدميرة
طفل وبت بضفيرة
ع الأرض ملقَّحين
والدم العربى سايل
ع الطرحة وع المرايل
واحنا راقدين علايل
بسكاتنا مكفّنين
وبعلو الصوت انادى
واقول خربت بلادى
اطفال من دور ولادى
فى دماهم معجونين
وشباب زى السنابل
قتلوهم بالقنابل
والقلب ماعدشى قابل
واشكى لمين ولاّمين
وغيوم سودا ف سماكى
والضاحك يصحى باكى
وغراب البين يكاكى
على جثث الميّتين
والناس وسط الشوارع
تهتف والقلب دامع
تصرخ ولا حد سامع
على عالم طرشانين
ويسيل دم الغلابة
بين انياب الديابة
وكأننا وسط غابة
وبيبانها متربسين
والناس عَمَّال تهاتى
للرايح واللى آتى
تصاريح وخطب يوماتى
وكلام فى الجرانين
والصبح على الشاشات
كُباراتنا بنضارات
وشيوخ لابسة عقالات
وكروشهم منفوخين
زاعقين وبكل هِمّة
وبيدعوا لعقد قمة
وكلام لبسنا عِمة
خلاّنا مصدّقين
وفجأة يطل المذيع
بخبر عاجل فظيع
هجم الديب ع القطيع
وكبارنا غفلانين
***
واقلب على الأوروبى
ويزيد همّى وغلبى
وتقيد النار فى قلبى
م الغيرة وم الأنين
وآلاقى الخواجات
طالعين بمظاهرات
رجال نساوين بنات
على غزة مقهورين
اللى يسب اسرائيل
واللى يلوم العميل
واحنا دفنَّا القتيل
وقعدنا مجنّزين
والقى العالم فى روما
مش خايفين م الحكومة
واحنا وخدانا نومة
ع الفرشة ودفيانين
والقى الخلق ف باريس
مش خايفة من البوليس
لا فيهم زول خسيس
ولابينهم خبّاصين!!
طالعين بالبرانيط
فى البرد وف الجليط
وانا وفتحى العبيط
فى القهوة مهيصين!!
شوفوا الأمم العظيمة
مرعوبة من الجريمة
واحنا امُّتنا سيما
حب ولوعة وحنين!!
دمعى ينزل سواقى
واقلب على مصر الاقى
صوت كاظم العراقى
بيغنى اشكيك لمين!!
والقى عساكر بشوبة
بتلطِّش فى العروبة
شفتوا ياناس العَجوبة
شفتوا الحال المهين
همك ياوطن حزَنّى
قهر وذل وتدنّى
مُت ولسَّاك تغنّى
ع اللى قتل ياسين!!
يابهية وخبرّينا
بالحق ونوِّرينا
هما اتهَّوا علينا
ولاّ احنا مورَّطين؟!
متهومة ياسمرة انك
ضربوا من بعد اذنك
طب ليه ساكتة وكأنك
على موتنا متفوقين
ومادام عاملة الشقيقة
قومى وقولى الحقيقة
فيه اخت تفوت فى ضيقة
خيّاتها مزنوقين
***
وفضلنا ليل نهار
منتظرين القرار
ونشوف ايه اللى صار
فى بلاد المكسورين
وهُب ياخال وهيلا
بعدالقصة الطويلة
نلقى رئيس فنزويلا
هو العربى المتين
يادى الخيبة التقيلة
خيبة الامة العليلة
لمّا رئيس فنزويلا
يشفق ع المسلمين
وه ياوطنّا العزيز
ماتغيرش من شافيز
واللهِ دا شئ يغيظ
ويخلّى العيشة طين
اصحوا يانايمين وفوقوا
قلبنا زادت حروقه
باعنا الدلاَّل فى سوقه
واحنا ولا داريانين
ياوطنّا ياابو العجايب
فى الجد تملِّى غايب
لا تقول عيب للى عايب
ولا تنجد غرقانين
غزة التايهة الجريحة
فى بلاد الشوم طريحة
جزّار ماسك دبيحة
وف إيده السكاكين
لكن حتعيش شهيدة
وسط الامة البليدة
حرة وشامخة وعنيدة
مايهمها معتدين
حرة وشامخة وعنيدة
مايهمها معتدين

» من فن الواو ( الدنيا ) الشاعر عادل صابر
» اهداء من الشاعر محمد فتحى للشاعر عادل صابر
» اهداء من الشاعر عادل صابر للشاعر محمد فتحى
» إهداء رايح جاى بين الشاعر محمد فتحى والشاعر عادل صابر
» لقاء الحروف . الشاعر محمد فتحى والشاعر عادل صابر ( 1 )