من فن الواو ( الدنيا ) الشاعر عادل صابر

عادل صابر‏
من فن الواو ( الدنيا )
***************
كفـــكف دموعــــك وماتنوح
واعمل كيفــــــانك طــواقى
آدم تـــــوفى ومات نــــوح
مين اللى ع الدنيــــا باقى !!

******
ماخـابرش أرض الدفـا فيـن
وقــليـــبى بالـمُــر حـــاوِى
فى الدنيا سارحة الدفافين
بـــيِّن شطـــارتك ياحـــاوى

******

على قدمى ماشى قرابات
ولا لَفْ راسى عِــمــامِـــك
خايـــنة ماليكى قـــرابــــات
غـــير الخسـايس عمامِــك

*****
دنـــيــا غـرورة ودار هـَــم
سجـن وكــلابـــش تـروُها
فى السعر ماتساوى درْهم
ياتعســـة اللى اشــتروهـا

******
فى طريقى غولة وشقافات......(شَق آفات )
والشوك فى قلـــبى مقسَّم
ولاخدت أجرى فى شقا فات
وايه العــمـل فى المقسَّـم!!

******
دنــيــــا نـــافـخهـــا ورَمْــها
ونـاديــها لــه ألـــف سـاقى
والـــلى سِـكِر يــوم ورامـها
لا شك سكن الفســـاقى!!

******
دنـــيــا بتُــمــكُر بلا حــدود
لو شمــش طالعـة اوعَسَلهَا.........( اوعى سيلها )
يامـــا كَلْـــناَ جـــوا البـلح دُود
وشربنـــا مُــر فى عسلْهــا!!

******
فـــيه نــاس زمـانهاحـارِمهـا
ع الأرض ماشـية رجـــايـــل........(على اقدامها )
دنــيا وخـــلَّت حــريمـهـــا
راسها بـــراس الرجــــايــل!!

******
فى اليــــابس ابنى ووسِّــع
دا البيت يشـــبــه لنــــاسه
فى النـــزّة حيطك يخـــسِّع
اصــــــل المياعة ف اساسه

******
حـنَك الـرديّــــة هبَشـــــنا
كمـا كلب واعِــــر بعـــــــوَّة......(دائم العواء)
شفناها خُـفنا وكمشـــنــا.......( اختبأنا)
خـوف العـــيال م البعـــوَّة!!.......(كلمة مرعبة لتخويف الاطفال فى الريف)

*******
الـحُـر خنقــاه بــشـــالهـا
ورغيفها يامـــا مشـالُــــه
تقـلانة على ضهره شالهاا
ولا خَـدْش أجـرة مشــالـه!!

*******
عايشين على الدنيا نواطير
وغيـطـانّا مالــهـــا حـدادى......(حدود)
من فِعْـــل ليّام نـاوى اطـير
حـتـى ان كلـتنى الحدادى!!

*******
الحُــر محزون لِبـخــتُــــه
فى الحق أُوعـوا تلْومــونى
الهِلف طـ،ـرحت لَبختُــــه........(شجرة اللبَخ وهى غير مثمرة)
وانا اللى هيَّـف لـمُــونى!!

*******
دنــيـا تــفرّقـنا تـــفــريــق
وتفـــوتنا عنـد الـمـــفارِق
رخصانة ماتساوى تـَفْ ريِق
ليـه تحـزنوا ع المِــفـارِق؟!

*******
امشى مـع الـدرب لـو دار
واوعاك تلوف ع الــمداخـل
وابعـد خـطاويــك عـن دار
لـو تلمـــح الهلف داخــل

*******
عـيـن الـرديّــة رعَـــتْـلى......(رصدتنى )
فى القلـب ربَّـت عِـلالى
والدهـر ديبُـه رعى اتلى.....(شجر الأتل)
والسُنط مِلِـك العـــلالى!!
********************************

» الشاعر عادل صابر‏ ( على جرح غزة )
» على جرح غزه . عادل صابر
» عادل صابر
» لقاء الحروف . الشاعر محمد فتحى والشاعر عادل صابر ( 1 )
» إهداء رايح جاى بين الشاعر محمد فتحى والشاعر عادل صابر