م عطيه شواش . دبدبى

م.عطية شواش‏
دبدبي علي صدري
دبي
هو عبك ولا عبي
لو كسرتي ضلع فيا
حكسر التاني بإيديا
مين بيطلب من حبيبه
يقتله ويديله ديه
انت ليه مش راضي تفهم
ان نصلك عدا فيا
وان انا فرحان بجرحي
وان انا قبلت الهديه
واني غرقان جوه دمي
وانت مستحلي الآذيه
مش حتنفع غير حبيبي
مش حتحلا الا بيا
بص في مرايتك وقولي
ايه ملامحك اللي فيا
الرموش بتطول عشاني
والشفايف برتقاني
والخدود المستويه
والعيون السوده فحمه
غمازاتك عامله زحمه
والحواجب عايزه رحمه
لما بلمسها بإيديا
بص في مرايتك وقولي
ان انا خسرت القضيه
مش حتنفع غير حبيبي
مش حتنفع الصداقه
مش حينفع بينا ممكن
او طبيعي
او لباقه
عن ابو ام الصداقه
اتخنقت صابتني ضيقه
كنت بمشي وراك اطفي
وانت بتولع حريقه
كنت بدفع نص عمري
وانت تتهمني بسريقه
مش طريقه
هو يعني عشان بحبك
كل يوم حفضل احايل
انت طايل
حد زيي يكون حبيبك
حد طيب
انت ليه رافض ايديا
تمسح الدمع القريب
انت ليه بعندك ياصاحبي
شئ يشيب
ليه طريقتك في الكلام
بتقولي ابعد عن طريقي
وان حبي ليك دا نزوه
ومش حقيقي
بل ريقي
مش حينفع كل يوم
حتقول صديقي
مش حقيقي

م عطية شواش

رابطة شعراء العامية المصرية
الله يا أستاذ عطية على براعتك الحرفية
وتمكنك فى صياغة النص بأسلوب السهل الممتنع .
فقد اخترت مفردات بسيطة جدا وسهلة الوصول لأى متلقى
واستطعت بخبرتك وحنكتك من ترويضها
وتضفيرها بشكل ابداعى عالى الجودة
والنص يحمل العتاب والبوح والاحتجاج
والرفض لأسلوب التعامل .
ورغم ان عشرات الشعراء كتبوا فى هذا الموضوع
الا ان هذا النص مختلف ومميز عن سابقه
ويحمل بصمة المبدع عطية شواش التى لاشبيه لها .
شكرا لك على الامتاع شاعرنا الجميل
ولك ارق تحية واجمل الزهور .
الشاعر محمد فتحى السيد

» انتظار . صلاح عطيه على يوسف
» مربع إهداء لصديقى م. عطية شواش
» مربع إهداء من الشاعر محمد فتحى الى الشاعر عطية شواش