عصر جديد ( عبد المنعم جبر عيسى )

عصر جديد
عصر جديد وعمر مديد يا شعبنا
تعلى راياتك بانتصاراتك يا حبنا
وتعيش حياتك بإنجازاتك دا فخرنا
وتشوف ولادك أبطال ساحاتك بعزمنا
***
رحلة طويلة بعدها عيلة وشعب أصيل
كانت إشارة حياة وحضارة لعمر طويل
تانى عبور مع ثورة جديدة لنهر النيل
معناها إننا عدينا بحر ومينا ولا فينا ذليل
***
شايفه يا بلدنا أولادك السمر الزين ؟
حالفين بترابك ورمالك وبكل أمين ..
ليخلوا كل سنين عمرك وسنين جايين
أحلى م السكر بعملهم واحنا شاهدين
***
إقرا تاريخنا تلقى حياتنا مليانه حروب
لجل وطنا يعلى مكانا فوق كل كروب
والمعركة الجاية أكيد اكبر من كل خطوب
لأنها إيد شغالة بكل أمانة ولا ليها غروب
***
والصحوة الكبرى آهى جاية ومعاها العيد
والفرحة الحلوة ف أحضانا والبسمة تزيد
لما الخير يكتر بعرقكو والإيد فى الإيد
عاشت أفراحنا بأبطالنا والكل سعيد
***
لجل ولادنا لجل أحفادنا لجل الأجيال
لجل بلدنا لبناء ذاتنا لازم أعمال
تروى طريقنا تهزم خوفنا ولا فيها محال
ترفع راسنا تعلى رايتنا فوق كل جبال
***
يا مؤمنين طول السنين لبوا الندا
صوت مصر عالى وسد عالى كان الصدى
دى معركتكو ولجل قوتكو يكون الفدا
محناش غلابه تايهين ف غابه دحنا ف هنا
***
فى خير بلدنا يكبر ولادنا وأكيد ح يزيد
ونعيش حياتنا نعلى بمكانا ولا نمد إيد
ويكون أملنا بمستقبلنا دايما سعيد
لأنه مالنا تراث أجيالنا لعصر جديد
***
عصر جديد وعمر مديد يا شعبنا
تعلى راياتك بانتصاراتك يا حبنا
وتعيش حياتك بإنجازاتك دا فخرنا
وتشوف ولادك أبطال ساحاتك بعزمنا

عبد المنعم جبر عيسى

» دموع قلم ( عبد المنعم جبر عيسى )
» أغنية ( صوت المكن ) ـ عبد المنعم جبر عيسى
» فى قريتى يموت الحب ! ( عبد المنعم جبر عيسى )
» شوارع تنزف .. أحيانا .. ! ( عبد المنعم جبر عيسى )
» ثورة تنوير . كلمات عبد المنعم مرعى