دموع قلم ( عبد المنعم جبر عيسى )

دموع قلم ( * )

فين الطريق .. فين سِكِّته ؟
وإيه نهاية محنته ؟
يا هل ترى الليل الطويل دا له شروق ؟
ولاَّ الشروق ماله وجود فى دنيته ؟
ع السِّكه تاهت خطوته
ع الشِّفه ماتت ضحكته
ودنيته .. صارت عذاب !
* * * * *
على ترعة فى البلد البعيد
كان حلمه واصل للقمر
أخضر مضفَّر
عالى كما الطير الجرىء
فوق كل ريح .. فوق السحاب
وف لحظة كان فيها الزمان :
غضبان فى قمة ثورته
صابه اللى صابه .. صار جريح
لأ .. صار حزين
قلبه اللى كان فى الحلم طال وش القمر
م الحسرة داب !
* * * * *
موال حزين .. أو قول أنين
بيطُل من كل العيون
وفراغ بيوسع ع المدى
ماله نهاية ف نظرته
ياخد يإيده للجنون
ويوم ما يرحم دمعته
يدِّيه أمل زايف لعين
ماله أساس فى قصته
علشان ما يرمى اليأس فى قلبه الحزين
ويا ليل طويل
ماله نهايه فى رحلته
هات الخداع .. هات الضياع
كل اللى فيك أسود غطيس
غطَّاه ضباب !
* * * * *
يا دنيا مالهاش فى الحياة
طوق نجاه
ياخد بإيد المحرومين
للشط لاخضر
مكتوب عليهم :
يمشوا طريق الحزن لمنتهاه
والتوهه فى عنيهم أمل :
فى صباح جديد
فى عيون وليد
فى دنيا مالهاش وجود
أو شوق يعود
بلقا الأحبة
اللى راحوا فى أزمته
تحت التراب !
* * * * *
يا دنيا مال وشك كئيب ؟
وربيع يغيب
وخريف يقرَّب كل يوم أكتر وأكتر
محصور ما بين أمس الحزين
وبكره تايه بين وبين
والنفس ضيعها الحنين
صوت التعاسه له رنين
والمحرومين ..
مالهم فى يوم النخاسه من تمن
حيران ما بين الآه وآه
دايق مرارة الكون
.. طعم الشجن
تايه ما بين الشوك ونار
تكوى ضلوع اللى اتوجع
أمَّا الجدع :
تايه لوحده ف دنيته ..
وهداه سراب !
* * * * *
آه يا حبيبه ..
لو فى يوم ضمك فؤاده ..
قبل الرحيل
آه .. يا حبيبه .. ترحلى ..
وحدك .. يا ( أمَّه ) ؟
طب ليه ترحلى ؟
والوعد كان إن الفراق دا شىء بعيد ..
أو مستحيل !
لسَّاه صحيح الليل طويل
والفجر جاى على خطوته
وآدى الجدع ساكت ما همه
صابر لحد ف يوم ما ترجع ضحكته
وف دربه يعرف سكِّته
وف يوم ما تسبق خطوته ؟
يعرف بإن :
كان رحيلك .. مش يإيدك
دا كان نصيبه م العذاب !

عبد المنعم جبر عيسى

---------------
( * ) فى ذكرى رحيل السيدة فاطمة عبد الرحيم الشاذلى .

مرحبا بك شاعرنا الجميل
الاستاذ عبد المنعم جبر عيسى
شكرا لك على انضمامك الينا فى الرابطة
ونحيط سيادتك علما بأن موعد هذه المسابقات قد انتهى
واعلنت النتائج قبل مشاركة حضرتك
وستبدأ أولى مسابقات العام الجديد من 1 يناير 2013
ويمكنك المشاركة معنا فى كل المسابقات التى تود ان تشارك بها
ونتمنى لك التوفيق بالفوز
سعدنا بجودك ولجودة شعرك
تم منحك عضوية رابطة شعراء العامية المصرية

» عصر جديد ( عبد المنعم جبر عيسى )
» أغنية ( صوت المكن ) ـ عبد المنعم جبر عيسى
» قصيدة ( دموع الكـــَرَزْ ).. للإشتراك فى المسابقه
» قصيدة( دموع الحزن) للشاعر محمد عبد العزيز عطا
» لموا دموع الخد ( الشاعر مدحت عطية )