نفسى يا امَّه . شعر فارس القرشى

نفسي يا امَّه
بانده عليكي آه يا امَّه ***
مشتاق لحضنك *** محتاج لضمه ***
نفسي أشوفك *** وابوس كفوفك
وتوحدي الفرحه ف صفوفك
والكرامه فوق جبينك ***
تاج يزينك كل لمحه ***
وف يمينك العداله ***
المحاله…تبقي سبحه ***
من عيونك ينتهي ***
زمن الخضوع ***
وف ولادك مستحيلات الدموع ***
في المدينه..في الكفور ***
في النجوع !!! *** مين يجوع
ينتهي عصر البطاله ***
يبتدي زمن البساله
كل رجالتك يا أمي شغلها مش بالقواله ***
ف المصالح كله صالح ***
والموظف شيئ يشرف ***
يرفض الرشوه ياغاليه ***
راسه عاليه ***
ينسي كل قوله عكره ***
زي فوت علينا بكره ***
حتي تكشيرته العجيبه ***
بدليهاله ابتسامه ***
وان دخلت القسم مره ***
ما اتعاملشي معامله مره !
أو كأني عليكي عاله ***
أو كأني كوم زباله ***
أصل أنا مش كوم زباله ***
نجده دايما ف الكروب **
جندي صامد ف الحروب ***
أنا جندي ***
زي غاندي **
لجل ما الأزمات تعدي ***
وأما كنتي ياما تبني ***
كنت أشمر عن سواعدي ***
وأبقي بنا ***
يبني أحلامك بهمه ***
يختلط دمي بترابك ***
وأبقي حبه من رمالك ***
وف جدارك أبقي طوب ***
لاجل مانخليكي يا امه ***
أسم خالد في القلوب ***
تبقي بين كل البشر***
غنوه حلوه يا قمر ***
رسمه خاليه م العيوب ***
نفسي يبقي رئيسنا قادر ***
يحمي شعبك م المخاطر ***
يبقي شاطر ***
مش ف جمع المال ***
وسُخره واغتيال ***
أو يدور حوالين رصيده ***
ألف مية مليون سؤال ***
أو بشلة بلطجيه ***
يحموا عرشه بأي حال ***
فيكي ألف حسين يا ناديه***
حرَّسي من نار يزيد ولا معاويه***
دوّري ف كل العيال ***
تاني هتلاقي جمال ***
يعلا دارك بالحلال ***
يرسم الفرحه ف نهارك ***
مش يكون ذل انهيارك***
زي تجار مصمصونا ***
وب بساطه خصخصونا ***
جدعنه ما فيهاش ..أنا ***
واحتكار ثلاثين سنه ***
ولا يعرضك زي العبيد ***
ويبيع بأيد عاطف عبيد ***
اللي أتبني ف ميتين سنه ***
باعه باعه .. ب انحلال ***
إنجدينا م الجدال **
دوّري ف كل العيال ***
كل أطفالك رجال ***
هاتلاقيهم يد واحده ***
إوعي .. تترجي بسؤال ***
م انتي عِشقك يا امه ظاهر ***
وف قلوبنا تمللي حاضر ***
نفسي يرجعلك جمال ***
بس ناصر .. بس ناصر ! **
......................
فارس القرشي
"مُحاضر مركزي بوزارة الثقافه
وعضو رابطة شعراء العاميه المصريه

» وحيد . شعر فارس القرشى
» أمَّا قصه !! . فارس القرشى
» إزازه عايمه . فارس القرشى
» دعوه للعزوبيه * فارس القرشى
» ماتناديش. كلمات الشاعر فارس القرشى . حلوان