هروب . شعر رانيا النشار

هروب

خلينى أتسلل من شراينك
خلينى أغمى عيون النبض العسكر منى
ساعدينى انى أهرب
وأتسرب من بين دهاليز العشق المخفى
فى خلايا القلب المتشعبط فى دموع الروح
مين خلى الدمعة
تلبد فى رموشى
وتهاجم نن عنيا ف وقت الفرح
مين غيرك يقدر يقطف نبض القلب
قبل الطرح
ساعدينى انى أهرب من دنياكى
خلينى أنساكى
عشان ترتاحى
متبصيش أبدا لجراحى
متخبيش الدمعة ف عينك
ورا نضارة خوف تهزمنى
ببقى حاسسها
تنبت شوك وأنين جوايا
مين غيرك يقدر
بينيمنى ع الأوجاع
وبنام مرتاح البال
مين غيرك
يقدر يسجن نبض الروح
ويطفى شموع الفرح فى عينى
صدقت كلامك
مقدرشى أتخيل شكل الدنيا بغيرك
مقدرش أحس بروحى وعايشه وانت مش موجود
مقدرشى أكمل تانى طريقى فى بعدك عنى
كنت بشوفك شمس حياتى
بس خسارة
مهما سنين هتلف كواكبى حوالين منك
هفضل دايما هنا فى مكانى
عايز انساكى
ابعدى كل جنونك عنى
أيوه بقول ع البعد راح أقدر
أيوه بقول بسهولة أنساكى
قبل ما أكمل جانى الرد
أيوه موافقة
أيوه موافقه انك تنسانى
لو هتقرر
أوعد قلبك مهما نسينى
هحبك تانى ويمكن أكتر
برضه موافقه
انك تهرب أو تتسلل من شراينى
بس يا عمرى
لو هتقرر
اهرب ليا اهرب فيا
اهرب لكن ..بين شراينى

» هروب * شعر رانيا النشار
» مايو . شعر رانيا النشار
» أغنية أمايا * رانيا النشار
» الوقت حان . شعر رانيا النشار . مهداة
» الرايا البيضا . شعر رانيا النشار